Sasing, Yurag nangu MVPs sa Sir Litz One on One camp
CEBU, Philippines - Sila si John Nimrod Sasing ug CJ Nathaniel Yurag maoy nangu sa listahan sa Most Valuable Players ubos sa advance category atol sa Level 1 sa 17th edition sa Sir Litz One on One Basketball Training Camp didto sa Yati Elementary School gym sa Liloan, Cebu.
Si Sasing gihagpat nga maoy labing maayong camper sa 18-under, samtang si Yurag nga sakop sa Team One on One nga mipakugang sa University of the Visayas aron pagsakmit sa Under-11 title sa Cebu Youth Basketball League (CYBL) sa miaging bulan, maoy labing maayo sa iyang age-group.
Ang uban pang advance MVPs mao silang Ryan Dominic Limboy (10-under), Awah Joel Liong (13-under) ug Jade Dayday (15 under).
Samtang mihimo’g impresiyon aron koronahang MVP sa beginners sila si Christian Matthan Bandoy (18-under), Don Justin Pilapil (15-under) ug Lee Michael Dahil (12-under).
“Amo na silang gipili dili lamang tungod sa maayo nilang abilidad ug performance, apan tungod sab sa ilang disiplina ug maayong batasan nga gipakita atol sa camp,” matud pa ni One on One training director Edsel Vallena.
Ang Level 2 sa tinuig nga summer clinic nagpadayon na karon sa susamang binyu.
Alang sa dugang impormasyon kabahin sa One on One camp, kadtong mga interesado mahimong mokontak sa 0906-4683775 o 0943-6068834. (BANAT NEWS)
- Latest
