Krema (157)

KINABUKASAN din, tinawagan ni Lex ang kanyang mama para sabihin ang tungkol sa kanila ni Krema. Kaharap ni Lex si Krema habang kausap ang kanyang mama.

“Magpapakasal na ako Mama,” sabi niya.

“Aba, biglang-bigla naman yata yan, Lex. Taga-saan ang babaing pakakasalan mo?’’

“Taga-rito sa Villareal, Mama. Napakaganda niya. Kapag nakita mo siya ay tiyak na magugustuhan mo. Bukod sa mabait ay maganda pa.’’

“Ano ang kanyang pa-ngalan?’’

“Krema.’’

“Ang gandang pangalan. Saan mo naman siya nakilala?’’

“Ang kanyang ama ay   matalik na kaibigan ni Tiyo Mon. Si Tiyo Mon ang nagpakilala sa akin.’’

“Aba e di kilalang-kilala pala ni Mon ang pamilya ni Krema. Mabuti naman at si Mon ang nagpakilala sa’yo.’’

“Kilalang-kilala po talaga siya ni Tiyo Mon.’’

“O e kailan naman ninyo balak magpakasal ni Krema?’’

“Baka po sa susunod na buwan, Mama. Ihahanda na po namin.’’

“Aba e sige. Gusto ko nga e mag-asawa ka na at para magkaapo ako.’’

“’Yan ang gagawin namin Mama. Gagawa agad kami ni Krema.’’

“Sige, balitaan n’yo ako ng mga gagawin n’yo.’’

Natapos ang pag-uusap ng mag-ina.

“Ang bait pala ng mama mo Lex.’’

“Mabait talaga ‘yun.’’

“Sa isang buwan na ba talaga tayo pakakasal?’’

“Oo.’’

“Excited na ako Lex.’’

KINABUKASAN, nag­yaya si Lex na magtungo sila sa bukid.

Namasyal silang mag-kahawak-kamay. Masayang-masaya ang dalawa.

Nang mapadaan sila sa malinis na ilog, nagyaya si Lex.

“Maligo tayo.”

“Sige.’’ (Itutuloy)