Aussie rider bumida sa Stage 2 ng Le Tour

MANILA, Philippines - Nasungkit  ni Australian Sean Whitfield ang Stage Two ng Le Tour de Filipinas sa kabila ng mababaw nitong kaalaman sa ruta ng Albay at Camarines Sur nitong Linggo.

Nagtala si Whitfield  ng apat na oras, 19 minuto at 21 segundo na parehong oras na naisumite ng 25 iba pang riders kabilang si general classification (GC) leader Daniel Whitehouse ng Great Britain.

Pumangalawa si Korean Sanghong Park ng LX Cycling Team habang pumangatlo naman si Spanish Fernando Grualba ng Kuwait Cartucho.Es.

“Sprinting is a little bit my specialty. I and my teammates made our attack in the final 10 kms but entering the final 300 meters, I went for the win and held on,” ani Whitfield.

Sa pagtatapos ng Stage Two, bahagyang gumalaw ang Top 10 sa general classification kung saan umangat si Grualba sa ikaapat (2:00 behind) habang nanatili sa ikalima si Jai Crawford (Australia, Kinan, 2:00), ikaanim si Eiichi Hirai (Japan, Ukyo, 2:04), ikapito si Nathan Earle (Australia, Ukyo, 2:04), ikawalo si Salvador Guardiola (Spain, Ukyo, 2:04), ikasiyam si 2015 champion Thomas Lebas (France, Kinan, 2:04) at ika-10 si Edgar Nohales Nieto (Spain, 7 Eleven Roadbike Philippines, 2:04).

Hindi naman maganda ang ratsada ng Pinoy riders kung saan nasa ika-33 si 2014 titlist Mark Galedo (2:13). Ika-17 naman si Ruston Lim (7 Eleven Roadbike) habang ika-22 ang katropa nitong si Arjay Peralta.

Ang Philippine National Team members na sina Mervin Corpuz (38), George Oconer (39), Boots Ryan Cayubit (48), Jerry Aquino Jr. (62nd) at John Renee Mier (66th) ay nasa ibabang puwesto.