Menosan nang patay
Mahimong nakaamgo na si Presidente Rodrigo Duterte nga di mahimo nga hangtod sa hangtod siya nga magpakabuta-bungol sa mga pagsaway gikan sa sud ug sa gawas sa nasud batok sa iyang gubat sa ilegal nga drugas. O mahimong nakumbinser na sa mga naglibot niya nga lisod ipasabot kon magsige na lang sila og ihap sa mga patayng lawas sa gidudahang mga durugista nga mangligdas matag adlaw.
Mahimo sang nakaamgo si Duterte nga di diay mapahilom sa iyang inadlaw nga mga balikas ug mga panginsulto ang sibaw nga kabalaka sa United Nations, Estados Unidos, European Union, ug ubang mga institusyon sa pagsulbong sa extrajudicial killings sa unang mga adlaw sa iyang pamunoan.
***
Dakong hagit karon sa kapolisan ang dakong kausaban sa direksiyon sa kampanya batok sa ilegal nga drugas. Batakang tahas sa bag-ong gilusad nga Oplan Double Barrel Alpha: Pagmenos sa dugo ug pag-usbaw sa dakop. Gikan sa agresibong mga engkuwentro nga kasagaran nisangpot sa pagkamatay sa suspitsadong mga durugista ngadto sa pagposas sa labing dagko ug inilang mga durugista.
Ang pagkabutyag sa bag-ong direksiyon sa kampanya wa maggikan sa tabian nga si PNP Director General Bato dela Rosa kon dili sa di ingon ana katabian nga tigpamaba sa Malakanyang nga si Ernesto Abella. Di sayon alang ni dela Rosa ang pag-angkon nga mahimong may kasaypanan ang ilang nasugdan.
***
Sa labing uwahing opisyal nga ihap sa kapolisan, 3,878 na ang nangamatay sukad sa paglingkod ni Duterte sa Malakanyang: 1,725 ang napatay sa mga operasyon sa kapolisan; ug 2,153 ang gitawag sa Kampo Crame nga deaths under investigation (DUI), nga gitataw nila nga di pa angayng tawgon dayon nga EJKs o vigilante killings.
Kon wa pa mausab ang direksiyon sa kampanya sa drugas, may sukaranan ang kabalaka nga mokapin na sa 6,000 ka patayng lawas ang mangligdas sa di pa matapos ang tuig. Tungod sa Double Barrel Alpha segurong mapun-an ang 31,629 ka mga nadakpan nga buhi.
***
Mahimong nadutlan na sang pamunoang Duterte sa laing sibaw nga pasangil nga pulos mayukmok ray naigo sa gubat sa drugas. Kay di ikalimod nga makabungog nga mayoriya sa mga gipatumba sa Oplan Tokhang mao ang mga sakop sa labing ubos nga hut-ong sa katilingban. Nipasalig ang Malakanyang nga ang puntirya sa bag-ong kampanya mao na ang mas dagkong target.
Ambot may nahibilin pa bang drug lords nga wa pa mahatagi og immunity ni Justice Secretary Vitaliano Aguirre. Ug ambot may adunahan pa bang mga negosyante nga gilambigit sa drugas nga wa pa ka-amen ni Duterte. Hinaot nga sa mosunod nga mga adlaw di ta lingaw-lingawon lang og dinakpanay sa mga artista nga gipasanginlang mga durugista.
- Latest
