Huwag iboykot ang kasal
Dear Dr. Love,
Ikakasal na po sa darating na Disyembre ang bunso kong anak na si Geraldine sa isang lalaking malayo ang kuwalipikasyon kung ihahambing sa aking anak.
Mataas ang pinag-aralan ng aking anak at kabilang sa pangunahing graduate sa pinagtapusan niyang kolehiyo, habang ang magiging asawa naman niya ay pogi lang dahil high school ang natapos.
Ito po ang malaking palaisipan naming pamilya ni Geraldine, dahil mistulang hindi niya ginamit ang talino niya sa pagpili nang makakasama sa buhay.
Ikinabigla ko po ng todo nang ipagtapat ng aking anak na boyfriend na niya si Dante, samantalang hindi man lang namin namalayan na nanligaw ito.
Dating manliligaw ng nakakatanda kong anak na si Marita si Dante at nagpapasalamat akong malakas ang pakiramdam ng aking anak sa pagkabatugan ng kanyang manliligaw kaya basted po ito sa kanya.
Lahat na po nang pakikipag-usap at pakikiusap ay ginawa na naming mag-anak kay Geraldine para ma-realize niya ang lahat at magbago ang pasyang pakasal kay Dante.
Sinabi namin na kung may nangyari na sa kanila at buntis siya, nakahanda kaming suportahan siya basta huwag lang papakasal. Pero hindi po nakinig ang bunso ko. Sa halip ay lumayo na ang loob niya sa aming pamilya niya.
Nang mamanhikan na ang pamilya ni Dante, sinabi ng ina niya na akala raw nila ay habambuhay na nilang susuportahan ito. Bagay na lalong nagpatibay sa obserbasyon ko sa tunay na pakay ni Dante sa aming anak.
Economist at nagtuturo sa isang university si Geraldine. Pero hindi niya maunawaan ang hangarin namin para sa kanya. Sa palagay ko nakuha siya sa gandang lalaki at buladas ni Dante. Plano kong hindi dumalo sa kasal bilang protesta. Pero nakiusap ang iba ko pang mga anak na huwag nang iboykot ang kasal para maipakita na anuman ang kahinatnan ng relasyon nila nang pakakasalan niya ay nananatiling nasa likuran niya ang kanyang pamilya.
Tama po ba ang desisyon ng mga kapatid ni Geraldine? Hihintayin ko po ang inyong mahalagang payo.
Gumagalang,
Worried Mama
Dear Worried Mama,
Sang-ayon ako sa desisyon ng iba mo pang anak. Kung minsan sa kabila ng pagsisikap ng mga magulang na matuto sa mas madaling paraan ang kanilang anak, mas pinipili nito ang mahirap na proseso. Kaya hayaan mo lang, nasa hustong gulang na naman siya. Ang isipin mo na lang ay hindi ka nagkulang ng pangaral. Nasa mga anak mo na ang pagpapasiya kung ano ang pipiliin nilang maging buhay. Kaya don’t worry.
DR. LOVE
- Latest