Pangamba
Dear Dr. Love,
Greetings. Tawagin mo na lang akong Simeon, 57-anyos. Naglakas-loob akong sumulat sa iyo dahil sa aking problema.
Bata sa akin ng 20-years ang misis ko at maganda pa at pusturyosa. Wika nga, sa ganda niya ay marami pa ang magkaka-interes sa kanya.
Sa katunayan ay mainit pa siya at palahanap samantalang ako ay hindi ko na matugunan ang kanyang paghahanap.
Hindi naman ako puwede sa mga gamot sa pagkalalaki dahil may karamdaman ako sa puso. Hindi naman siya nagagalit kapag tinatanggihan ko siya sa dahilang pagod ako. Ngunit hindi ko alam ang nasa isip niya. Baka disappointed siya sa akin.
Nagtatrabaho siya sa bangko bilang teller at natatakot ako na baka matukso siyang makipagrelasyon sa mas bata na kayang ibigay ang kanyang gusto.
So far naman, walang nangyayaring ganito dahil lagi ko siyang sinusundo. Halos sabay ang aming work schedule at ‘di kalayuan ang aming pinagtatrabahuhan.
Pero ano ang puwede kong gawin para maibalik ang aking kakayahan?
Simeon
Dear Simeon,
Kung magkasabay naman kayo araw-araw ay wala kang dapat ipangamba. Ipaunawa mo sa kanya ang iyong limitasyon dahil sa iyong edad at health condition. Mauunawaan niya ‘yun dahil asawa ka niya.
Tumbasan mo na lang ang kakulangan mo sa pamamagitan ng ibang paraan. Huwag kang magpapakita ng pagiging mainitin ang ulo at maging malambing ka sa kanya. Unawain mo siya kapag mayroon siyang pagkukulang dahil ikaw ay may pagkukulang din.
Mag-date kayo palagi, regaluhan mo siya nang madalas para ipakitang mahal na mahal mo siya.
Higit sa lahat, sabay kayong manalangin palagi at magbulay sa Salita ng Diyos.
Dr. Love
- Latest