Nangangamba sa planong kasal
Dear Dr. Love,
Matagal na akong tagasubaybay ng column mo. Gustung-gusto ko ito dahil pinapalawak nito ang kaalaman ko tungkol sa iba’t ibang sitwasyon sa buhay pag-ibig. Ngayon ako rin ay naghahangad na mapagpayuhan mo sa problema ko.
Itago mo na lang ako sa alyas na Gema. Marami rin akong napupulot na pointers mula sa mga payo mo pero ngayon ay magiging specific ako sa aking problemang ihihingi ng payo.
Kung lovelife ang pag-uusapan, wala na akong mahihingi pa dahil sobrang mapalad ako. Napakabuti at mabait ng aking papa at mama, at nakatagpo ako ng kasintahang faithful at mapagmahal.
Kakaiba ang boyfriend ko. Kay dami niyang sakripisyong ginawa para sa akin. Minsan ay napag-usapan namin ang pagpapakasal. Buo na ang plano. Pero kung minsan sa aking pag-iisa ay may pangamba ako.
Ang kinatatakutan ko ay baka matulad ako sa iba kong kaibigan na iniwanan ng asawa dahil sumama sa ibang babae. Natatakot akong mangyari ito sa akin gaya nang nararanasan sa kasalukuyan ng dalawang matalik kong mga kaibigan.
Hindi rin ako sigurado kong sapat ang kakayahan ng boyfriend ko na magpamilya dahil maliit lang ang kanyang sweldo. Pagpayuhan po ninyo ako.
Gema
Dear Gema,
Sa plano ninyong pagpapakasal ng boyfriend, nananatili ang pag-aalinlangan mo sa kanya. Kung ganito rin lang, iisantabi n’yo muna ang inyong balak para mas makapag-isip-isip ka. Magiging unfair naman sa boyfriend mo kung sigurado siya sa hangarin niya sa iyo pero ikaw ay hindi nakakatiyak sa disposisyon mo para sa kanya at sa inyong mga plano.
Tandaan mo na ang pagpapakasal ay mahalagang desisyon sa buhay kaya dapat pag-aralang mabuti ang estado ng puso para hindi mauwi sa pagsisisi.
Dr. Love
- Latest