Ambisyosa ang nililigawan
Dear Dr. Love,
Umaasa ako na sa pagdating ng sulat kong ito sa iyo ay nasa mabuti kang kalagayan. Tawagin mo na lang akong Sandro, 23-anyos at isang binata. Second year high school lang ang natapos ko at wala akong alam na trabaho kundi magtinda ng karne sa palengke. Maganda naman ang kinikita ko.
Mayaman ang babaeng nililigawan ko. Huwag mo nang sabihin ang pangalan. Siya ay 19-anyos at nag-aaral ng law.
Ang sabi niya sa akin, papatol lang siya sa akin kung ako’y makakapagtapos din ng abogasya. Ganyan siya ka-ambisyosa, Dr. Love. Gusto rin niya na maging milyonaryo muna ako bago niya ako sagutin.
Gaano ko man isipin, imposible ang hinihingi niyang kondisyon dahil ako lang ang nagta-trabaho sa aming pamilya. Ang nanay at tatay ko ay parehong matanda na.
Minsan naiisip ko na sumuko na sa panliligaw sa babaeng ito. Pero mahal ko siya. Ano ang gagawin ko?
Sandro
Dear Sandro,
Ambisyosa nga siya at sorry to say pero, mukhang mata-pobre. Pero ang sinabi niya ay dapat magsilbing hamon sa iyo. Huwag mong maliitin ang pagtitinda ng karne sa palengke. Marami ang yumaman sa ganyang negosyo.
Magsikap ka. Hindi ka man makatapos ng law, alam ko na nasa iyo ang oportunidad para yumaman. Kapag mayaman ka na, hindi lang isang babaeng katulad niya ang matatagpuan mo.
Dr. Love
- Latest