May relasyon sa amo
Dear Dr. Love,
Please po, itago mo na lang ako sa pangalang Marrah, nagtatrabaho ako sa Dubai bilang isang secretary. Dalawang taon na akong nagtatrabaho sa isang kompanya rito. May boyfriend ako sa Pilipinas pero hindi ko naman masyadong mahal.
Niligawan ako ng aking boss na isang Arabo at dahil mabait siya at guwapo, sinagot ko siya at magkarelasyon na kami ngayon. Mabait naman siya at hindi niya ginagalaw ang pagkababae ko.
Nakipag-break na rin ako sa boyfriend ko at pumayag naman siya.
Minahal ko siya kahit alam kong may asawa na siya. Sabi niya, puwede naman niya akong pakasalan dahil pwede naman ito sa Islam. Basta raw magpa-convert ako sa relihiyon nila.
Isa po akong Christian at active ako sa mga fellowship namin dito. Hindi ko lang masabi ang aking relasyon sa aking mga kasama.
Dapat ko bang ipagpatuloy ang relasyong ito?
Pagpayuhan mo po ako Dr. Love.
Marrah
Dear Marrah,
Ang desisyon ay nasa sa iyo, Marrah. Pero tandaan mo na bagamat hindi tayo pinipigilan ng Diyos na gawin ang gusto natin, sa bawat aksyong ginagawa natin, naaayon man o labag sa kalooban ng Diyos, ito ay may katumbas na consequence o bunga.
Naging Kristiyano ka na at alam mo na ang kalooban ng Diyos. Hindi ka na dapat patangay sa bugso ng nadarama mo.
Kaya ang maipapayo ko sa iyo ay pagbulayan mong mabuti ang kalagayan mo at magpasya ka: Ang kalooban mo o ang kalooban ng Diyos?
Dr. Love
- Latest