Too Young
Dear Dr. Love,
Tawagin mo na lang akong Wendy. Sabi ng iba, napakabata ko pa raw para umibig dahil 14-anyos pa lang ako. Magse-second year pa lang ako sa pasukan at mayroon na akong boyfriend na second year college.
Kapitbahay namin siya. Maliit pa ako ay binibiru-biro na niya ako at kuya ang tawag ko sa kanya.
Pero nang maging dalagita ako ay niligawan na niya ako. Umibig naman ako sa kanya kahit binabawalan ako ng mga parents ko, ang sabi bata pa raw ako.
Ang tanong ko po ay wala pa ba akong karapatang umibig sa edad na ito? Mabait naman ang boyfriend ko at kung mag-date man kami, puro pasyal at kain sa labas. Manood man kami ng sine ay nakaakbay lang siya sa akin at hindi ako hinahalikan.
Dapat ko bang sundin ang gusto ng parents ko na layuan muna siya dahil bata pa ako?
Wendy
Dear Wendy,
Ikaw ay isang menor de edad pa kaya ingatan mo ang iyong sarili. Sa pagkakalarawan mo sa iyong boyfriend ay tila mabait at responsable naman siya.
Huwag lang kayong lalampas sa boundary. Tama na ‘yung pamamasyal at kain sa labas. Pero ‘yung panonood ng sine ay nadadarang kayo pareho sa tukso kahit pa sinasabi mong hindi ka naman hinahalikan. Ang tanong ay hanggang kailan?
Mas mabuti kung sa bahay ninyo ka niya dadalawin nang madalas at nakikita ng mga magulang mo.
Marahil, makikita ng iyong magulang na isa siyang responsableng lalaki at marunong gumalang sa iyong pagkababae.
Dr. Love
- Latest