Noah gi-ban 20 ka duwa
CEBU, Philippines – Ang NBA misuspenso ni Joakim Noah sa New York Knicks sud sa 20 ka duwa nga way bayad gumikan sa paglapas niini sa anti-drug policy sa liga.
Gipahibawo sa NBA kagahapong adlawa nga si Noah nagpositibo sa pagtumar og matang sa substansiya nga makita sa mga 'over-the-counter' supplements. Ilang gisita si Noah sa paggamit niini og Selective Androgen Receptor Modulator LGD-4033 kon SARMs, usa ka matang sa ginadili nga substansiya sa World Anti-Doping Agency (WADA).
Si Noah wala na makaduwa pa sukad niadtong Pebrero 4 ug lagmit dili na kini makasilbe sa katapusang 10 ka duwa sa Knicks karong season gumikan sa angol niini sa wala niyang tuhod.
Gipadayag sa NBA nga magsugod ang suspensiyon ni Noah sa higayon nga maayo na ang pisikal niining kahimtang ug duna nay pagtugot nga puyde na siyang makaduwa og balik.
Laktod pagka sulti, padayon siyang suspendido sa dili mominus 10 ka duwa sa sunod nga NBA season o sobra pa gumikan kay si Noah dili pa man makaduwa karon gumikan sa iyang kahimtang.
Nagtuo hinoon ang NBA players' union nga wala tuyoa sa 6'11" nga forward ang paghimo sa maong sayop.
"Joakim was completely forthcoming and cooperative throughout the investigation and we believe that this isolated occurrence was a regrettable mistake," matud pa sa unyon sa opisyal niining pamahayag. "Joakim has offered his deepest apologies for this infraction, and neither he nor the NBPA will pursue an appeal."
Si Noah anaa karon sa unang tuig sa upat ka tuig niyang kontrata nga mibalor og $72 million uban sa Knicks. Duna siya'y average nga 5.0 puntos ug 8.7 rebounds karong season apan nalimitahan lamang siya ngadto sa 75 ka duwa sa miaging duha ka tuig. (BANAT NEWS)
- Latest
