Mahimong mo-request og kanta

CEBU, Philippines - Nagmaya og samot ang Pinoy fans sa Coldplay sa dihang  gihatagan sila og tsansa sa ilang idolo nga maka-request og kanta alang sa umaabot nga concert sa maong grupo dinhi sa Pilipinas.

Ang Coldplay mag-concert karong Abril 4 sa Mall of Asia.  Sa website sa maong grupo,  gidasig nila ang ilang fans  nga mohimo og  mubo nga video ug isulti kun unsa  nga kanta ang gusto nila nga i-perform sa ilang idolo ug i-upload kini sa  Instagram gamit ang  hashtag #ManilaRequest.

“If you’re coming to any of the upcoming shows in Asia and there’s a Coldplay song you’d like to hear, then we’d love you to send us your request video,” suma pa sa Coldplay.

Ang maong grupo maoy nagpasikat sa awit nga The Scientist.

Ian ug Bea gihangop

Wala damha ni Ian Veneracion ang init nga paghangop sa   publiko sa tandem nila  ni Bea Alonzo  sa seryeng A Love To Last.

Nasayran nga kanunay nga mahimong trending ang mga episode sa maong serye.

Mapasalamaton si Ian sa iyang fans gumikan kay bisan sa iyang pangidaron ,  padayon gihapon siya nga  nakadawat og init nga suporta.

Una na nga ni-click ang karakter ni Ian kaniadto sa seryeng  Pangako Sa ‘Yo ug nagsagunson dayon ang iyang mga proyekto sa ABS-CBN.

  Mga pagkaon nga abunda sa bitamina maoy sekreto ni Ian   kun nganong bata pa ang iyang hitsura. 

Mika dili tugtan maka-uyab

Gibutyag ni Mika de la Cruz nga dili pa siya tugtan sa iyang ate nga si Angelika dela Cruz nga makauyab  gumikan kay giisip pa siya niini nga “baby” sa ilang pamilya busa mawili gyud kini kaniya.

“Hindi pa rin niya tanggap na nagdadalaga na ako,” suma pa ni Mika kinsa niangkon nga 18 ka tuig ang gap nila sa iyang ate.

Matud pa ni Mika nga pinangga kaayo siya sa iyang igsuon ug nagsilbi usab kini isip usa sa iyang mga mentors sa pag-arte.

Serye ni Marian naluto na!

Malipayong gipahibalo ni Marian Rivera nga magustohan gyud sa mga “chikiting” ang upcoming series niya sa GMA-7.

Gisugdan na sa miaging adlaw ang pre-production alang sa maong proyekto ug malipayon kaayo ang aktres gumikan kay nakabalik na gyud siya sa trabaho.

 “Brainstorming with the creative team of my new teleserye,” suma pa sa Instagram post sa aktres.

Kauban ni Marian sa pre-production ang mga direktor niini nga sila si Michael Tuviera ug  LA Madridejos. 

Erich ug Geoff suwayan

Aduna na’y bag-ong leading man si   Erich Gonzales human sa breakup nila ni Daniel Matsunaga.    Si Erich maoy bida sa episode sa Maalaala Mo Kaya karong gabii ug si Geoff  Eigenmann  ang iyang leading man. Kahinumdoman nga si Geoff maoy third party nila ni Erich ug Daniel sa serye kaniadto sa ABS-CBN nga "Be My Lady." 

Piolo gisuwerte

Puwerting lipaya ni Piolo Pascual gumikan kay nalakip sa Osaka Film Festival 2017 ang gi-produce niya nga pelikula nga “Kita Kita.” Gibidahan kini nila ni Empoy ug Alessandra de Rossi.  Aktibo ang aktor sa pag-produce og mga pelikula karong panahona.

Nagselos

Niulbo ang taho nga matud pa nagselos si Gabbi Garcia ngadto sa bag-ong bitoon sa  Encantadia nga si Arra San Agustin. Nagpares sila si Arra ug Ruru Madrid nga ex-boyfriend ni Gabbi.

Paugat gihapon

Wala kaayo hatagi og gibug-aton sa pipila ka netizens ang pag-lenggua ni Julia Montes nga espesyal si Coco Matin sa iyang kinabuhi. Nasayran nga taud-taod na nga giatngan kun kanus-a moangkon ang duha sa ilang relasyon.

Namuwa ang aping

Namuwa ang tuo nga aping ni Julie Anne San Jose human sa sinagpaay nga eksena nila ni Jean Garcia sa seryeng “Pinulot Ka Lang Sa Lupa.”  Suma pa ni Julie Anne nga wala ra siya’y problema niini aron ma-feel pud niya og maayo ang iyang karakter.

Pinili lang

Gibutyag ni Anne Curtis nga dili tanan niyang kauban sa It’s Showtime ang maimbitar sa kasal nila ni Erwan Heussaff karong tuiga.  Matud pa sa aktres nga kinahanglan nga duna’y mahibilin sa maong show aron dili maapektohan ang programming niini.

Wife material

Ang boyfriend ni Jasmine Curtis Smith nga si Jeff Ortega  mihulagway sa aktres nga “wife material”.  Bisan pa man sa maong pulong, gibutyag ni Jasmine nga wala pa sa ilang hunahuna nga magminyo gumikan kay naa pa sila’y  tagsa-tagsa nga mga prayoridad sa ilang kinabuhi,

Pasok sa Worldfest

Malakip ang  indie film ni Lotlot de Leon nga 1st Sem sa  50th Annual Worldfest-Houston International Film and Video Festival. Ang maong film festival mahitabo sunod buwan sa Flagship AMC Studio 30 Theaters sa Southwest Houston, Texas sa Amerika.

Vice mihimakak

Gihimakak ni Vice Ganda ang tsika nga brokenhearted siya hinungdan nga gipaputlan niya ang iyang buhok. Suma pa sa TV host nga ganahan lang siya sa iyang bag-ong hairstyle ug wala kini koneksyon sa kasamtangang dagan sa iyang kinabuhi.  (BANAT NEWS)