Way kidnapper sa Toledo – hepe

CEBU, Philippines - Niluwat og opisyal nga pamahayag ang hepe sa kapolisan sa Dakbayan sa Toledo kabahin sa nikatap nga taho nga adunay kidnapping sa dakbayan.

Giklaro ni Superintendent Samuel Mina Jr. nga base sa ilang intelligence reports wala’y grupo sa mga kidnappers nga naglihok sa dakbayan.

Dugang ni Mina nga gikinahanglan pa nga i-verify ang maong hitabo aron dili makamugna og kabalaka ingon man kahadlok sa mga tawo.

Gipaneguro sa hepe nga seryuso ang ilang pagtagad sa maong alegasyon ug gani iyang gitahasan ang iyang mga sakop sa paghimo og precautionary measures aron malikayan nga mahitabo ang kidnapping.

Nakig-alayon sab ang mga polis sa mga ginikanan ingon man sa mga tunghaan.

Gidasig ni Mina ang publiko sa pagmabinantayon ug dili magpataka og post sa social media sa dili pa kompirmado nga report.

Una niini nidangop sa sibyaanan sa BN-FM Toledo ug sa kapolisan ang amahan nga si Roger Sampayan labot sa nahitabo sa iyang anak nga grade 7 sa Luray 2 National High School.

Matud pa nga dihang nilabang na ang iyang anak sa karsada paingon sa eskwelahan, giingong gihan-an og gukod sa nagmaskara nga lalaki nga nagbarug duol sa puti nga van nga wala’y plate number ug adunay laing duha ka kauban.

Nidagan ang tinun-an balik sa ilang balay sa Sitio Drilling nga naghangos ug nihilak nga nisumbong sa iyang amahan.

Unang nabaniog sa social media sa niaging semana nga adunay tulo ka lalaki nga niduol sa usa ka inahan nga taga Barangay Captain Claudio kay buot nga paliton ang iyang anak sa kantidad nga P10,000.  - /GMR) (BANAT NEWS)