136 inmates sa CCJ dunay HIV

CEBU, Philippines - Naalarma ang kagamhanan sa siyudad sa Sugbo sa report nga ilang nadawat nga kapin usa ka gatos ka priso sa Cebu City Jail ang nataptan og sakit sama sa HIV, Tuberculosis ug uban pa.

Ang Cebu City Jail adunay 4,174 ka mga inmates ug ang 192 kanila ang dunay mga sakit.

Base na sa report nga gihatag sa bag-ong Jail Warden sa Cebu City Jail Superintedent Arnel Peralta moabot sa 136 ka inmate sa maong pasilidad ang adunay Human-Immuno Virus nga sinugdanan sa sakit nga Acquired Immune Deficiency Syndroms (AIDS.

Gituohan nga adunay inmate nga aduna nay sakit nga HIV maoy nagdala niini sa sud ug nagtakod-takod ilabi na nga adunay nigamit og injectable drugs sa sud.

Samtang moabot sa 23 ang nataptan og tuberculosis, siyam niini ang multi ug extensively drug resistance ug adunay 24 ka psychiatric cases o nangalisoan sa pangisip ang maong priso.

Gihulagway ni Konsehal Dave Tumulak, Chairman sa Committee on Public Order and Safety nga risgo kini sa ubang mga inmates nga posibleng matakboyan.

Usa sa problema nga ilang giatubang kay dili mahimong ilahi og selda ang mga masakiton gawas lang niadtong psychiatric cases kay mapasanginlan sila og diskriminasyon.

Sigon usab ni Peralta nagpadala sila og request sa siyudad pagpangayo og tabang ilabi na diha sa Department of Health kay nagkinahanglan sila og doktor nga moatiman sa mga pinirisong masakiton.

Sa first quarter karong tuiga gikan sa buwan sa Enero hangtod Marso moabot na sa 16  ka priso sa CCJ ang namatay. Niadtong Enero pito ka inmates ang nakalas, duha sa Pebrero ug pito sa buwan sa Marso. (BANAT NEWS)