Minglanilla milangkat sa Gov. Cup South title

CEBU, Philippines - Gi-sweep sa Minglanilla Archangels ang Dalaguete AgriSaurs  sa ilang ‘best-of-three’ finals series, apan nag-agi una sila og overtime sa wala pa mokulit og 98-90 nga daog aron pagsakmit sa  South Division title sa  2017 Cebu Governor’s Cup Under-21 Inter-Cities and Municipalities Basketball Tournament didto sa Dalaguete Sports Complex niadtong Domingo sa gabii.

Ang Minglanilla mikolapso human naglabaw og 26 puntos duha ka higayon, apan nagsandig sa pagkamabayanihon ni Marc Glen Nebril, kansang krusyal nga tres sa himalatyong segundos sa regulasyon nakahatag kanila og laing kinabuhi.

Si Nebril ug ang manghod  niining si Mark Justin nagmangtas dayon gikan sa pagsugod sa duwa aron paghatag sa Minglanilla og dakong 51-25 nga labaw sa nahibilin nga 4:42 sa ikaduhang kuwarter.

Apan  kalit   lang   nga nabugnaw ang Minglanilla nga gipahimuslan sab dayon sa Dalaguete ang kahigayonan pinaagi sa paglusad og 18-4 run ubos sa pagpangulo ni Erikson Sangoyo hinungdan nga nakasikit sila sa halftime, 43-55.

Padayon nga nanginit ang Dalaguete hinungdan  nga   nakalabaw sila, 67-66 sa naghinapos nga bahin sa ikatulong kuwarter.

Ang Minglanilla mikontrolar og balik sa duwa sa sayong bahin sa katapusang kuwarter, apan dali nga nailog og balik ang labaw sa Dalaguete.

Napawong na unta ang paglaum sa Minglanilla, apan si Marc Glen Nebril mipasulod og 3-pointer nga nakapatabla sa iskor 82-all sa nahibilin nga 3.5 segundos sa regulasyon.

Duna unta’y tsansa si Nebril nga sayong ihatag ang kadaogan sa Minglanilla kay nakakubit man  siya og foul gikan ni Earl Justine Balbuena, apan nasipyat  siya sa iyang bonus throw hinungdan sa overtime.

Sa dugang singko minutos sa duwa, sikit na sab ang engkuwentro, apan ang tres ni Mark Justin Nebril sa nahibilin nga 1:28 maoy nakahugno sa Dalaguete.

Si Marc Glen Nebril mipabuhagay og 26 puntos sa Minglanilla, nga nagpaabot na karon sa modaog sa North Division Finals tali sa Mandaue City ug Consolacion nga maoy ilang sangkaon sa kampiyonato sa Governor’s Cup ug sa P500,000 nga ganti.

Si Jan Mangaron miamot og 19 puntos, si Mark Justin Nebril miiskor og 17 ug si Jiesel Tarrosa midonar og 15 puntos sa Minglanilla. (BANAT NEWS)