Lancers, Panthers mobanat na sa bayugan Mayor’s Cup
BAYUGAN CITY, Agusan del Sur, Philippines – Uban ang taas nga paglaum ug napuno sa pagsalig, ang University of the Visayas Green Lancers ug University of Southern Philippines Foundation Panthers mosugod na sa ilang kampanya sa Kim Lope Asis Mayor’s Cup Basketball Invitational 2017 dinhi sa Lope A. Asis Memorial Gymnasium karong adlawa.
Sa duha ka mga pambatong team sa Sugbo, ang Lancers mao ang dunay mas bug-at nga tahas
gumikan kay ilang sangkaon ang Emilio Aguinaldo College Generals sa pasiunang duwa sa alas-9 sa buntag ug dayon makigtige sa Xavier University-Ateneo de Cagayan Crusaders sa main game sa alas 8:30 sa gabii.
Ang Panthers hinuon maoy unang makigtakus sa Crusaders sa ala-1 sa hapon, samtang ang Generals human makig-atbang sa Lancers, makighamag batok sa University of Sto. Tomas Growling Tigers sa alas-7 sa gabii.
“Tsansa na sab ni namo aron masukod kun unsa ka solido ug kalig-on ang among team. Amo sab tan-awon kun asang aspeto sa among duwa ang kinahanglan pa namo i-improve,” matud pa ni Lancers head coach Gary Cortes.
Human naghari sa St. Isidore Parish Fiesta Cup Inter-Collegiate Basketball Tournament usa ka bulan ang milabay didto sa Saint Bernard, Southern Leyte, ang Lancers mipakurat sa ilang mga kontra dayon na ngadto sa pagpahiluna sa ikaduhang dapit sa “Araw ng Quezon” inter-commercial tournament didto sa Bukidnon sa miaging semana.
Wala hinuo’y gipasalig ang Lancers kun unsay buhaton nila sa Bayugan, apan misaad sila himuon nila tanan aron makapakita’g nindot ug makalingaw nga salida matag duwa.
Ang lima ka mga entrante moduwa og single round robin diin ang top 2 maoy mag-abot sa tinaktakay nga kampiyonato. Ang teams No. 3 ug No. 4 maoy mag-engkuwentro alang sa ikatulong puwesto.
Ang makampiyon mobulsa og P200,000, samtang ang malandig gikan sa ikaduha hangtod sa ikaupat nga dapit modawat og P150,000, P100,000 ug P75,000. Ang mangiwit nga koponan hatagan og P50,000 nga consolation. (BANAT NEWS)
- Latest