Lasprillia naka-anghel sa SMCCO
CEBU, Philippines - Ang buzzer-beater ni Sidney Lasprillia maoy nibayaw sa San Miguel Community Chapel Organization ngadto sa kadaugan batok sa Penthel, 47-45 sa United Barkadahan Basketball League (UBBL) First Conference niadtong Huwebes didto sa Wireless Cultural and Sports Plaza sa Subangdaku, Mandaue City.
Siyete puntos ra ang nahimo ni Lasprillia, apan ang iyang marka bahala nga itsa sa nahabiling dos segundos igo na kaayo aron modaog ang SMCC ni team manager Lamarcus Pananganan. Si Christian Yepes maoy mipakita og maayong salida diin miiskor siya og 13 puntos aron pangulohan ang SMCCO.
Si Berting Resohinto mao sab ang topscorer sa Penthel nga miburak og 13 puntos. Sila si Jeward dela Cerna ug Bobby Castro parehong mitimbre’g 10 puntos sa pilderong Penthel ni team manager Sean Young.
Sa nag-unang duha ka kuwarter, ang SMCCO maoy pirmeng naggukod, apan human sila makatabla, 18-all sa upat ka sunod-sunod nga puntos ni Joven Opone, sila na ang midiktar sa nahabiling mga kuwarter.
Sa laing duwa, ang Direct Global Online Solutions yano kaayong mikulit og daog pinaagi sa pagdemolis sa Landtraders World Properties Corp., 65-53.
Pagsugod pa lang, nakapanimaho na sa ilang sayong kadaugan ang Direct Global human sila mitala og 18-2 paghuman sa unang 10 minutos sa duwa. Miburot pa kini ngadto sa 39-8 sa halftime.
Bugtong konsolasyon sa Landtraders mao lang ang paglaslas sa labaw aron paglikay sa makauuwaw nga lubong.
Nagmangtas og maayo si Jeffrey Perater, kinsa mipabuhagay og 22 puntos aron mangu sa tanang scorers sa Direct Global.
Ang naparot nga Landtraders gipangulohan sab ni E. Caducoy pinaagi sa iyang 19 puntos.
Mikulit sab sa una nilang daog ang Grand Land, Inc. pinaagi sa paglubong sa Raphael’s Sports Cafe, 70-57.
Wala kapugngi si Marvin Java diin miiskor siya og 28 puntos aron mangu sa Grand Land, Inc. ni team manager Ryan Go. Nakatampo sab og daku si Christopher Obeso nga adunay 15 puntos.
Duha sab ka players sa Raphael’s Sports Cafe ang miiskor og double figures kortesiya nilang Vince Justin Vega ug Mark Giangan nga nagkumboya’g 21 puntos.
Ang liga nga duwaon matag Martes ug Huwebes sa gabii giabagan nilang Allen Colina ug Gerald Hilay.
Puntos matag usa
Unang duwa:
Direct Global (65) – Perater 22, Bernard Ares 8, Casuco 8, Muñez 5, Sanchez 4, Bernie Ares 4, Tubo 4, Mahidlawon 3, Nieves 2, Sardido 2.
Landtraders (53) – Caducoy 19, Paden 13, Tuñacao 9, Ermac 4, Tulod 2, Cobello 2, Sasrsale 2.
Ikaduhang duwa:
Grand Land Inc. (70) – Java 28, C. Obeso 15, N. Obeso 9, Solinap 5, Ursal 3, Compasion 2, Brigoli 2, Migabon 1.
Raphael’s Sports Cafe (57) – Vega 11, Giangan 10, Abarquez 8, Dongallo 7, Cosedo 5, Sampan 4, Mantalaba 3, Zanoria 2, Sedaya 2.
Ikatulong duwa:
SMCCO (47) – Yepes 13, Sidney 7, Tudio 7, Opone 5, Malig-on 4, Rosales 4, Javellana 2, Matidios 2, Romagos 2.
Penthel (45) – Resohinto 12, Dela Cerna 10, Castro 10, Baring 5, Wagas 4, Montero 2, Getaruelas 2. (BANAT NEWS)
- Latest
