Generika palaban sa PSL Invitational

MANILA, Philippines - Asahan nang magiging title contender ang Generika dahil sa pagsuporta sa kanila ng Ayala Corp. bilang bagong backer para sa 2017 Philippine Superliga (PSL) Invitational Conference na hahataw sa Sabado sa FilOil Flying V Center sa San Juan.

Gagabayan ni national women’s team head coach Francis Vicente, ang Lifesavers ay tatawagin nga-yong Generika-Ayala na hahamon sa mga San Miguel Corp. MVP Group of Companies, Foton, Cocolife at Sta. Lucia Land, Inc.

Dadalhin ng two-time champion na Petron ang San Miguel Corp. habang ang Cignal ay susuportahan ng MVP Group of Companies.

May solido ring grupo ang Foton at Cocolife, samantalang gagawa naman ng eksena ang Sta. Lucia sa kanilang PSL debut.

Huling naging aktibo ang Ayala sa competitive sports  noong 1990s nang iparada ang Purefoods Hotdogs sa Philippine Basketball Association (PBA).

Sina Jojo Lastimosa, Alvin Patrimonio at Jerry Codiñera ang pumagitna bilang poster boys bago naibenta ang prangkisa sa SMC noong 2001 na nagresulta sa pagkontrol ng San Miguel Pure Foods Company, Inc. sa basketball team.

Ngayon ay nagbabalik ang Ayala sa sport.

“In sports, we see the potential of how our athletes can become advocates of health and wellness and drivers of positive change in the communities that we serve,” sabi ni Ayala Corp. managing director and public affairs group head Rene Almendras sa team launch na dinaluhan nina PSL chairman Philip Ella Juico at PSL president Ramon “Tats” Suzara sa Ayala Tower One.