Konseho nangayo’g katin-awan pag-regulate sa habal-habal

CEBU, Philippines - Nangayo og katin-awan ang konseho sa Dakbayan sa Sugbo sa Land Transportation Office ug Department of Transportation labot sa pag-regulate sa mga habal-habal.

Matud ni Konsehal Raymond Garcia, chairman sa committee on laws, nga ang rekomendasyon sa mga nahisgutang ahensiya ang gikinahanglan aron pagseguro nga ang gidusong ordinansahon dili makasapaw sa nasudnong balaud. Si Konsehal Pastor Alcover Jr. ang niduso sa ordinansahon nga magtugot sa siyudad nga maka-isyu og prangkisa sa mga habal-habal drivers aron ma-regulate ang ilang operasyon sa kadalanan. Gihulagway ni Alcover nga ang siyudad kinahanglan manginlabot niining operasyon sa mga habal-habal isip public transportation.

Matud pa nga ang pag-regulate sa mga habal-habal usa sa pamaagi aron maseguro ang kaluwasan ug proteksiyon sa sumasakay.

Gipaabot nga usa ka public hearing ang himoon sa konseho karong Nobiyembre 29 diin ilang giimbitar ang tanang nalambigit nga stakeholders aron madungog ang ilang sentimento mahitungod sa ordinansahon.

Lakip si Konsehal Joel Garganera ang nagtinguha sa regulasyon sa operasyon sa mga habal-habal sa dakbayan.

Si Garganera maoy chairman sa committee on environment, energy, transportation, communication and other utilities.

Kahinumduman si Mayor Tomas Osmeña ang nagtinguha sab nga moumol og terminal alang sa mga habal-habal.

Gani gi-organized nila ang mga habal-habal drivers sa 80 ka barangay sa dakbayan. GMR   (BANAT NEWS)