Buhis sa mga sakyanan
Inay magtukod og bag-ong kadalanan ug mga taytayan, o mopalapad sa hagip-ot nga mga agianan nga nakasaksi sa inadlaw na nga pagkabara sa trapiko, nisugyot ang pamunoan ni Presidente Rodrigo Duterte nga menosan ang gidaghanon sa bag-ong mga sakyanan pinaagi sa pagpahamtang og dakong buhis.
Nipasidaan dayon ang mga kongresista, nga klarong di ganahan nga mopahamtang og bag-ong mga buhis, nga moburot pag-ayo ang presyo sa bag-ong mga awto kun mapatuman ang excise tax sa mga sakyanan nga gisugyot ni Finance Secretary Carlos Dominguez III. Apan naglaom ang mga sakop sa gabinete ni Duterte nga samtang motiyabaw ang mga motorista hangpon ang sugyot sa mga pasahero nga maoy mas daghan kay makapagaan sa problema sa trapiko.
* * *
Mao na ang gisugyot nga dagkong buhis sa bag-ong mga sakyanan nga gisugyot sa Department of Finance (DOF) ngadto sa Kongreso:
Himuon na nga 5% ang buhis sa mga awto nga may presyo nga ubos sa P600,000 (o hangtod sa P30,000);
20% ang buhis sa mga awto nga presyohan og gikan sa P600,000 ngadto sa P1.1 milyones (o hangtod sa P200,000);
40% ang buhis sa mga awto nga may presyo nga gikan sa P1.1 milyones ngadto sa P2.1 milyones (o hangtod sa P800,000); ug
60% ang buhis sa mga awto nga pesyohan og kapin sa P2.1 milyones (o hangtod sa P1.26 milyones).
* * *
Duha ang sukaranan sa pagsupak sa pipila ka kongresista:
Una, pipila ra ka dakbayan ang naproblema sa trapiko, sama sa Metro Cebu, Metro Manila ug Davao, ug busa di makiangayon nga bunalan sa dugang buhis ang tanang mamalit og mga sakyanan sa tibuok nasud; ug
Ikaduha, kay bag-ong mga sakyanan ra man ang pahamtangan og dugang buhis, madasig ang mga motorista sa padayon nga paggamit sa daan ug bisan sa kagang-kagang na nilang mga sakyanan nga segurong mosangpot sa mas makahilo nga kalikopan.
* * *
Gihamok ang mga kongresista ug mga senador sa gidangatan sa mga politiko nga nangusog sa pagpahamtang og dugang buhis. Lab-as pa sa ilang panumdoman ang pagkapilde ni Senador Ralph Recto, nga karon maoy Senate Minority Leader, sa piniliay sa Senado niadtong 2007 kay siya ang giila nga utok sa value added tax (VAT) nga nipaburot sa presyo sa tanang palaliton ug pangalagad.
Apan di malalis nga ang kabarato sa mga sakyanan ug sa lana nakatampo sa paghuot sa kadalanan. Unsaon pagbalanse ang dinaliang panginahanglan sa pagpahapsay sa trapiko ug ang pagpanalipod sa mga konsumidor ug sa gawasnong patigayon? Mao nay angay nga pamalandongan sa mga magbabalaod, nga ang kinabag-an alyado sa administrasyon, samtang padayon nilang gituki ang panginahanglan paghatag ni Duterte og emergency powers pagsulbad sa trapiko.
* * *
- Latest
