PCSO nihatag og bahin sa Kapitolyo

CEBU, Philippines - Ang kagamhanan sa lalawigan sa Sugbo nakadawat og P1.8 milyones nga kantidad sa tseke niadtong Biyernes gikan sa Philippine Charity Sweepstakes.

Kini mao ang duha ka porsiyentong bahin sa Kapitolyo sa kinatibuk-ang halin sa PCSO sa lotto operations nila sa probinsiya.

Si Gobernador Hilario Davide, III maoy midawat sa tseke nga gitunol sa chairman sa PCSO nga si Jeorge Corpuz.

Dinhi sa Sugbo, adunay 44 ka recipient municipalities sa revenue-sharing scheme sa PCSO diin lima ka representante sa mga lungsod sa Malabuyoc, Samboan, Liloan ug Daanbantayan ang nitambong sa kalihukan. Nunot niini, niadtong nilabay’ng buwan sa Hulyo niining tuiga si Senador Ralph Rector niduso sa House Bill No. 60 alang sa automatic remittance sa multi-billion peso fund sa PCSO alang sa pagpamalit og mga medisina, improvement sa mga tambalanan ug attainment sa universal healthcare.

Sa sayo pa, si Presidente Rodrigo Duterte nipahibawo nga buot niya nga ang pundo sa PCSO magamit alang sa panglawas.

Gawas sa tseke, ang PCSO nanghatag usab og lima ka ambulansiya diin ang mga nakadawat mao ang Saint Anthony Mother and Child Hospital-Cebu City, Talisay City District Hospital, Bureau of  Fire Protection sa dakbayan sa Carcar, lungsod sa Catmon ug Rescue Assistance Peacekeeping Intelligence Detail Inc. nga usa ka non-government organization.

Ubos sa Akta Republika 1169  nga ang PCSO mogahin og 30 porsiyento sa ilang gross income alang sa Charity Fund, 55 porsiyento alang sa mga premyo ug 15 porsiyento alang sa operations. (BANAT NEWS)