Talisay City Jail naghuot na

CEBU, Philippines - Gitug-an sa jail warden sa Talisay City Jail nga naghuot na karon ang ilang mga piniriso diha sa ilang tagsa-tagsa ka mga selda.

Matud pa ni Jail Chief Insp. Josephus Jelianggao, cottages ang tawag nila sa ilang prisohan ug aduna lang kini kapasidad sa pagserbisyo og 104 ka piniriso.

Apan sa pagkakaron tungod sa kadaghan nga nadakpan, niabot na sa 467 ang ilang mga binilanggo diin ang congestion rate niabot na sa 347.90 porsiyento. Sa maong gidaghanon, 418 niini mga lalaki ug 49 niini mga babaye.

Gibutyag ni Jelianggao nga nisaka ang populasyon sa bilangguan tungod sa subsub nga kampanya batok sa ilegal nga drugas. Hinuon nalipay siya dihang gisaaran ni Mayor Eduardo Gullas nga hatagan og pundo alang sa pagpalambo sa maong pasilidad.

Asoy niya nga si Gullas nigahin og P11 milyones   alang sa ilang buhatan. Diin alang niya nga ang P5 milyones igahin sa pagpatukod og cottage alang sa mga babayeng piniriso.

Gawas sa pagtukod sa mga cottages, magpalit usab sila sa uban pang mga kinahanglanon sa ilang buhatan. (BANAT NEWS)