EDITORYAL - Kataw-anan

Ang mga guwardiya sa lainlaing mall ug dagkong department stores nagpatuo nga estrikto kaayo sila nga mohiling sa mga tawo nga mosulod sa ilang gibantayan nga balay patigayon.

Adunay mga metal detectors ang nagbantay sa mga entrance sa mall ug hilngon gyud ang mga bag. Ang uban hinoon nga mura’g kapuyan na, tutokan na lang nila ang mga mosulod.

Walay problema kun mga pusil lang ang makalusot, kay ang tinuod, sayon ra man kaayo lutsan ang mga guwardiya kun tuyoon gyud nga magdala og armas.

Apan ang peligro mao ang mga tawo nga posibleng mohimo og mga lihok nga makapaguliyang sa publiko, sama sa pagpaulbo og bomba. Kumon kaayo nga talan-awon diha sa mga entrada sa basement parking sa mga malls nga pahunongon sa mga guwardiya ang mga sakyanan.

Molibot dayon sila sa sakyanan nga magdala og stick nga sa tumoy, adunay samin nga kunohay, gitan-aw nila ang ilawom sa sakyanan. Klaro kaayo nga tinonto ra gyud na.

Kun ang mga terorista gusto nga maghimo og kaguliyang pinaagi sa pagpaulbo og bomba sa basement parking, nganong anha man ilawom sa sakyanan ibutang ang bomba?

Bisan pa og anha ibutang ang bomba sa ilawom sa sakyanan, makit-an gyud kaha kini sa mga guwardiya gamit ang samin? Nahimutang ra gyud og kataw-anan ang gihimo sa mga guwardiya ug mas maayo pa og ila kini nga hunongon ug mangita sila og laing paagi.

Ang mga Muslim dinhi sa Sugbo dili gyud makatugot nga adunay ilang mga kadugo nga mohimo’g kagubot kay maapektohan ang malinawon nila nga pagpuyo.

Tungod niini, angay nga ang mga Muslim motabang pagbantay nga walay ilang mga kadugo nga makahimo og kagubot dinhi sa atong malinawong dakbayan.