Armado napusilan sa polis, nasikop sa ospital

CEBU, Philippines - Sa ospital nadakpan sa kapolisan ang lalaki nga nagpatambal sa iyang samad pinusilan human kini nisukol og polis hinungdan nga napusilan sa usa ka KTV bar sa Sta. Ana, Brgy. Poblacion, dakbayan sa Toledo pasado alas 2 sa nakalabay nga kadlawon.

Nadakpan sulod sa Pinamungajan District Hospital si Alfredo Rosapa, taga Brgy. Camuga sa lungsod sa Pinamungajan human kini napusilan ni PO1 Christian Ejijay sa Toledo City Police. Matud ni PO2 Joselito Genon, desk officer sa Toledo City Police Station nga gialarma si Rosapa kauban ang iyang grupo nga nakakita og away sa KTV bar ug giingong armado.

Si PO1 Elijay nga naninda duol sa KTV bar maoy giduol sa mga tawo.

Sumala pa ni Genon nga sa dihang nagpaila nga polis si Elijay kalit lang kining gipusil sa suspek apan swerte nga wala naigo. Sa pagbalos sa polis naigo si Rosapa sa iyang tiyan apan nakasibat ug nakasakay sa motorsiklo.

Human nasayran sa mga polis nga taga Pinamungajan ang suspek, dali sab silang nakig-alayon sa Pinamungajan Police Station ug pasado alas 5 sa kadlawon ilang nasayran nga adunay tawo nga napusilan nga nagpatambal.

Dugang ni Genon nga sa dihang gisubay sa mga polis ang tambalanan positibong giila ni PO1 Elijay ang suspek maoy nipusil niya ug iyang napusilan. Gibalhin sab dayon sa Vicente Sotto Memorial Medical Center si Rosapa human gi-aresto samtang nagpaayo sa samad pinusilan  ug nagpaabot nga kapasakaan og kaso. (BANAT NEWS)