EDITORYAL - Panalipdan ang kalinaw

Ang giisyu nga travel advisory sa US Embassy ngadto sa ilang mga lumolupyo nga nagplanong mobisita sa Sugbo ug Bohol, nasuportahan tungod sa panag-engkuwentro sa mga tropa sa kagamhanan ug mga armadong tawo didto sa Inabanga, Bohol kagahapon.

Ang report nga may mga bandidong grupo nga nagtinguha nga mangidnap og mga langyaw dinhi sa Sugbo ug Bohol, sigurado nga makapaturok na gayud og kahadlok niadtong mga nagplano nga mosuroy sa mga tourist spots sa Bohol ug ubang dapit sa Sugbo.

Lisud kaayo katuohan kun nganong anhi man gyud mangidnap og mga turista ang mga bandidong grupo, nga lisud man kanila ang pagpangita og katagoan. Apan dili gihapon kini makapahanaw sa kahadlok sa mga turista nga sila makidnap.

Kun imong tan-awon ang mapa sa Pilipinas, lisud alang sa mga bandidong grupo nga nagbase sa Mindanao nga anhi mohimo og pagpangidnap kay wala sila’y katagoan nga may mosuporta kanila. Tinuod, daghang Muslim nga ania magpuyo sa Sugbo apan kadaghanan kanila mga mahigugmaon na og kalinaw.

Mibiya sa Mindanao kining maong mga Muslim kay gikapoyan na sila sa kagubot didto sa dapit nga namat-an nila og kahayag. Kini ang rason nga lisud katuohan nga ang mga Muslim nga ania dinhi mosugot nga gubton sa ilang mga kadugo ang malinawon nila nga pagpuyo.

Apan husto ang tambag sa atong mga opisyal sa kagamhanan nga kinahanglan moabag ang katawhan pagbantay sa atong palibot aron dili masudlan og mga dautang elemento. Sama sa nahitabo sa Inabanga, Bohol nga ang mga tawo mitaho dayon sa kapolisan diha nga may nangabot nga kadudahan ang linihukan ug armado.

Kini maoy hinungdan nga pagsusi sa mga polis ug militar, nahitabo dayon ang pinusilay. Leksyon kini sa mga kauban sa bandidong grupo nga lisud nila sudlon ang atong lugar kay nagkahiusa kita aron ipatunhay ang kalinaw.