2-anyos nalumos sa fishpond

CEBU, Philippines - Patay na nga naabot sa tambalanan sa lungsod sa Boljoon ang usa ka 2 anyos nga batang lalaki human kini nalumos sa gamay nga fishpond diha sa Brgy. Poblacion sa maong lungsod.

Ang bata naila nga si Jonnefer Dulie Sarona Jr., anak sa magtiayong Princess Mae ug Jonnefer Sarona Sr., samtang ang tag-iya sa fishpond mao si Jimmy Taga-oc.

Ang hepe sa Women and Children Protection Desk (WCPD) sa Boljoon Police, Senior Police Officer 2 Cristina Pantujan mitug-an nga gibilin sa inahan sa iyang silingan si Jonnefer kay mipalit kini og newspaper alang sa iyang agalon.

Ang silingan nga gipiyalan sa bata wa makabantay nga nilusot ang bata padung sa luyo sa ilang kusina ug milahos sa fishpond sa likod.

Sa ilang pagpangita nakita na lang nila nga naglutaw na ang bata sa fishpond nga usa lang ka metro ang gilawmon.

Way plano nga kasohan sa kapolisan ang inahan sa bata kay balido man ang rason sa paglakaw niini.

Gimandoan sa mga polis ang tag-iya sa fishpond nga butangan og kural ang palibot niini. (BANAT NEWS)