4-anyos gipatay’g hubog
CEBU, Philippines - Usa ka 4-anyos nga batang lalaki nga anak og polis gidunggab sa silingan nilang hubog samtang ang biktima nagduwa duol sa ilang balay didto sa Sitio Tianggihan, Brgy Duljo-Fatima, Dakbayan sa Sugbo kagahapon sa udto.
Ang bata nga si Emmanuel Martinez Jr. anak ni PO1 Emmanuel Martinez nga nadestino sa San Nicolas Police Station, kinsa mao ra usab ang midakop sa suspek nga si Danilo Remulta, 49.
Si Senior Inspector Eduard Sanchez, hepe sa Mambaling Police Station, miingon nga nagduwa-duwa ang biktima dili layo sa ilang balay dihang gitawag kini sa suspek.
Pagduol sa bata kalit kining gitukmod ni Remulta ug samtang natumba ang bata, gihansakan kini og kutsilyo sa buko-buko nga milapos sa kasing-kasing sa biktima.
Pagkasayod sa amahan sa nahitabo sa iyang anak, nagdali kining miresponde ug gidakop si Remulta ug gihatod ang iyang anak sa ospital apan namatay kini.
Sulod sa bilanggoan, ang suspek miingon nga gibugal-bugalan kuno siya sa bata. Apan giangkon ni Remulta nga nakasuyop siya og ginadiling drugas kagahapon ug hubog siya nianang higayona.
Ang kapolisan mopasaka og kaso nga murder in relation to Republic Act 7610 batok ni Remulta nga gitanggong pa sa lock-up cell sa Mambaling Police Station. (BANAT NEWS)
- Latest
