Babayeng “asset” gipatay

CEBU, Philippines - Giulo pagpusil sa wa mailhing mamumuno ang babayeng giingong police informant diha sa atubangan sa dakong mall sa Brgy. Tabunok, Dakbayan sa Talisay kagahapon sa kaadlawon. Ang biktima giila lang sa pangan nga si Kenyar, 20, nga taga Sitio Hawod, Brgy. Bulacao sa nahisgutang siyudad.

Si Sr. Insp. Albert Quilotorio, deputy chief sa Talisay City Police Station nibutyag nga ang biktima maoy responsable sa ilang mga sagunson nga kalampusan sa operasyon batok sa ginadiling drugas.

Una niini, girumbo sa kapolisan ang impormasyong gihatag ni Kenyar batok ni Lyndon Lastimosa alyas Dondon diha sa Fidel Bas St., Upper Mohon, Brgy. Mohon niadtong Miyerkules sa alas 3:10 sa hapon.

Apan nakaikyas si Lastimosa apan naabtan sila si Adhman Canangcaan, 40, nga nakuhaan og mga drug paraphernalia. Si Canangcaan mao ang drayber ni Maghaway brgy. kagawad Felix Abacahan nga nakigpinusilay sa mga sakop sa Provincial Intelligence Branch (PIB) niadtong miaging tuig.

Apil sa nasikop sila si Dennis Laborada, 30, nga nakuhaan og .45 nga armas nga aduna’y pito ka buhing bala ug walo ka gagmay nga paketeng shabu ug si Rizzamae Cacharro, 20.

Mga alas 9 sa gabii, girumbo sa mga operatiba ang Sitio Sombria, Brgy. Lawaan 1 tungod sa impormasyon nga si Lastimosa nasigpatan didto.

Apan nakasibat gihapon kini kay ang mga silingan nisiyagit nga adunay polis. Didto nadakpan si Lucky Van Entice alyas Teban, 26, kay nakuhaan og duha ka medium packs nga shabu.

Sa wa pa napatay si Kenyar nakahatag  kini og mga pangalan sa mga durugista nga iyang nailhan kay nasuhito siya niini tungod kay ang iyang kapuyo namaligya man og drugas kaniadto apan nasikop sa miaging tuig.

Naglakaw lang si Kenyar sa nahisgutang lugar sa dihang giduol kini sa mamumuno ug gidul-itan sa pagpusil diha sa iyang ulo.

Usa ka oras human gipatay si Kenyar gironda sa kapulisan ang Sitio Hawod, Brgy. Bulacao base sa nahatag niini nga impormasyon nga niresulta usab sa pagkasikop ni Gerald Joy Baguio alyas Insek, 29, ug Jeffrey Cabellon, 26, nga nakuhaan pareho og ilegal nga drugas.

Si Quilotorio nitug-an nga ang ilang asset nga si Kenyar ang nihatag kanila og impormasyon nga pulos nagpositibo ug wa silay laing gidudahan sa iyang kamatayon kondili ang grupo ra sa durugista. (BANAT NEWS)