Brgy. chairwoman itinumba sa Tondo
MANILA, Philippines - Patay ang isang 43-anyos na punong barangay matapos barilin ng dalawang beses sa ulo ng hindi pa tukoy na salarin habang naglalakad pauwi ng kanyang bahay sa Tondo, Maynila, kamakalawa ng gabi.
Isinugod pa sa Chinese General Hospital subalit binawian din ng buhay ang biktimang si Chairwoman Nenita Acu?a ng Brgy. 200, Zone 18 at residente ng Hermosa St., Tondo, Maynila.
Inaalam pa ang pagkakakilanlan ng suspek na nakasuot ng tribal gear na jacket, bull cap, maong na short at armado ng kalibre 45 baril.
Sa ulat ni SPO2 Richard Escarlan ng Manila Police District-Homicide Section, naganap ang pamamaril dakong alas-6:59 ng gabi sa Dela Cruz St., malapit sa panulukan ng Hermosa St., Tondo.
Katatapos lamang umanong magkabit ng mga tarpaulin sa lugar ng kaniyang nasasakupan ang biktima at naglalakad kasama ang barangay treasurer na si Jesskenlee Torres, 29 at iba pang kalugar nang bumuntot umano ang suspek at mabilis na pinaputukan ang biktima.
Nang bumagsak sa kalye ang biktima ay agad ding tumakas ang suspek habang si Torres ay humingi ng saklolo sa mga kasamahan para isugod sa ospital ang biktima.
Dakong alas-7:50 ng gabi nang ideklarang patay ang biktima.
Samantala, sa naging follow-up operation ng mga tauhan ni P/Supt. Alex Daniel, hepe ng MPD-Station 7, para tugisin ang pinaghihinalaang responsable sa pamamaslang ay isang Adrian Tayag, alyas Pitong sa bahay nito sa Tayag St., Tondo dakong alas-7:30 ng gabi ngunit hindi nila ito natagpuan.
Natiyempuhan naman na maaresto sina Allan Tayag, 19, at Florentino Cadano, 32, kapwa residente ng Hermosa St., na nakuhanan ng dalawang plastic sachet ng shabu at isang kalibre 38 paltik na kargado ng limang bala.
May hinala ang mga tauhan ng MPD-Station 7 na posibleng may kaugnayan ang naganap na pamamaslang kay Acuna sa pagkaka-aresto ng 3 katao sa lugar sa possession of illegal drugs o kasong paglabag sa Republic Act 9165 at illegal possession of firearms o RA 10591 noong Pebrero 25, 2017.
Nakiusap umano pamilya ng mga naaresto kay Acuna na makipagnegosasyon sa mga pulis para makalaya ang mga nadakip subalit tinanggihan sila.
Pinaghihinalaan umano si Acuna na nagbigay ng impormasyon kaya nadakip ang tatlong suspect.
Wala naman umanong kaaway sa lugar ang biktima.
Gayunman, wala pang matibay na basehan sa motibo at kung sino ang suspek sa nasabing insidente. Patuloy pa ang imbestigasyon ng MPD-Homicide Section.
- Latest