Security ni de Lima tinanggal na

MANILA, Philippines -  Kinumpirma ni Senate President Koko Pimentel na tinanggal na ang mga security mula sa Office of the Senate Sergeant-at-Arms na itinalaga upang magbantay kay Sen. Leila de Lima.

Ayon kay Pimentel, hindi rin naman nababantayan ng mga miyembro ng OSSAA si de Lima dahil 50 metro ang layo ng mga ito sa senadora kaya balewala rin.

“Yes wala na. Actually nagpadala kami. Pero, theoretically hindi din naman nakabantay. They were 50 meters away. Useless na,” ani Pimentel.

Sinabi ni Pimentel na pag-uusapan muna kung papaano makukumbinsi ang mga awtoridad sa detention center sa Camp Crame kung papaano makapagtatalaga ng OSSAA.

Ipinunto ni Pimentel na dapat ring respetuhin ang rules ng Philippine National Police.

“Titingnan muna naming ‘yung rules nila. Just as they respected our rules in the Senate we respect naman their rules,” ani Pimentel.

Kinumpirma ni Pimentel na nais ni de Lima na mayroon siyang bantay na OSSAA pero dapat umanong irespeto na ang PNP ang nakatalagang magbantay sa kanilang lugar.

Magtatalaga umano ulit ng OSSAA kay de Lima kung papayagan ito ng PNP.