Trapik ipaabot kang Digong

CEBU, Philippines - Ipaabot ni Cebu City Mayor Tomas Osmeña ngadto kang Presidente Rodrigo Duterte ang problema sa trapiko sa dakbayan atol sa ilang panagkita sa groundbreaking ceremony sa Cebu-Cordova Link Expressway karong hapon.

Pahinumduman ni Osmeña si Duterte labot sa plano nga ablihan ang Camp Lapu-Lapu access road sa publiko aron maminusan ang kahuot sa trapiko sa Banilad-Talamban corridor.

Sigun sa Mayor nga nahisgutan na niya kaniadto ang maong plano kang Duterte kinsa nisanong niini hinungdan nga iya kining pahinumduman.

Gihulagway ni Osmeña nga kung mabuksan sa publiko ang Camp Lapu-Lapu access road hayan duna’y road widening nga buhaton sa interior roads paingon sa Banilad-Talamban area aron maluag-luagan ang trapik.

Dugang niini nga si Duterte mahimong momando sa Department of National Defense sa Camp Aguinaldo aron buksan ang access road sa Central Command.

Gipasabot usab ni Osmeña nga gikinahanglan ang laing dalan nga magkonektar sa Barangay Lahug ug Guadalupe aron maminusan ang trapik sa dalan Escario ug M. Velez.

Apan iyang giangkon nga gikinahanglan niya ang suporta sa nasudnong kagamhanan sama sa pundo sa infrastructure projects nga iyang gitinguha sanglit ang prayoridad sa siyudad karon mao ang scholarship program.

Si Osmeña mohatag sa iyang speech sa groundbreaking ceremony diin usa sa iyang tukion mao ang 300-hectare reclamation project sa Lungsod sa Cordova nga matud pa usa sa iyang gitinguha sukad niadtong 1995.

Alang sa mayor ang 8.25-kilometer nga CCLEX makatabang aron mapalambo ang ‘viability ug feasibility’ sa Cordova reclamation project. (BANAT NEWS)