PDEA, mga kapitan nagtagbo na

CEBU, Philippines - Gituki sa Association of Barangay Councils sa Dakbayan sa Sugbo, Philippine Drug Enforcement Agency ug kapolisan ang operasyon batok sa ginadiling drugas.

Dinhi nakasabot si ABC president ug Tisa Kapitan Philip Zafra nga kinahanglan ang koordinasyon sa PDEA aron dili masubli ang nahitabo sa mga opisyal sa Barangay Ermita nga niresulta sa ilang pagkasuspenso karon.

Sa 80 ka barangay kapitan sa Dakbayan sa Sugbo, 14 pa lang ang nakaduso og mga pangan sa mga drug personalities ngadto sa PDEA hinungdan nga matud ni Zafra nga gitagalan nila hangtud sa Marso 15 ang mga kapitan aron makaduso sa lista. Si PDEA-7 Director Yogi Felimon Ruiz nihangop sa kalambuan nga nahitabo diin ang mga kapitan nipasalig nga mohatag og lista sa mga drug personalities sa ilang barangay nga gikonsiderar nga high value targets.

Gipasalig ni Ruiz nga confidential ang listahan. Samtang 29 ka sakop sa Barangay Anti-Drug Abuse Councils sa dakbayan nga gipaubos sa surprise drug test ang pulos negatibo ang resulta.

Ang drug test gipahigayon human sa maong tigum diin lakip ang mga representante sa PDEA-7 ug kapolisan.

Matud ni Dr. Alice Utlang, pangulo sa Cebu City Office on Substance Abuse Prevention (COSAP), nga maoy tinguha nila sa BADAC nga mahimong ehemplo human sila negatibo sa paggamit sa ilegal nga drugas.

Sa laing bahin, giduso na sa Cebu Provincial Anti-Drug Abuse Office (CPADAO) ngadto kang Gobernador Hilario Davide III ang listahan sa mga barangay nga girekomendar nga drug-cleared.

Matud ni Ivy Durano-Meca, pangulo sa CPADAO, nga sa 210 ka barangay nga unang girekomendar sa Cebu Provincial Police Office (CPPO), 190 niini ang na-validate na sa ilang buhatan sa administrative aspect.

Wala pa hinoon gibutyag ni Meca kung unsa nga mga barangay ang ilang girekomendar ngadto sa buhatan sa gobernador sanglit ila pa gipaabot ang resulta sa validation sa PDEA-7. Si Meca nagkanayon nga atol sa Provincial Peace and Order Council meeting sunod semana, ipahibawo sa gobernador ang mga barangay nga drug-cleared na.

Samtang mga durugista sa Dakbayan sa Lapu-Lapu ang giingong nigara human gihunong sa kapolisan ang Oplan Double Barrel. Gibutyag ni Chief Inspector Junel Caadlawon sa Lapu-Lapu City Police Office nga nagpadayon hinoon sila sa monitoring sa mga drug personalities ug ilang gipasa ang impormasyon ngadto sa PDEA.

Gihangop sa kapolisan ug sa ABC sa Dakbayan sa Lapu-Lapu ang plano nga pagbalik sa kampanya batok sa ilegal nga drugas ug nanghinaut nga mahitabo kini sa labing dali nga panahon. Decemay P. Padilla, Rowena D. Capistrano ug Le Phyllis F. Antojado (BANAT NEWS)