Warden sa CPDRC gihulipan

CEBU, Philippines - Gipatangtang dayon ni Gobernador Hilario Davide III ang warden sa Cebu Provincial Detention and Rehabilitation Center (CPDRC) nga si Dr. Gil Macato, usa ka adlaw human nga ang bilanggoan nasakmitan og mga drugas ug daghang kontrabando atol sa kinalit nga greyhound operation kaniadtong Martes.

Gitudlo ni Davide ang pangulo sa Capitol Security nga si Bobby Legaspi nga maoy temporaryo nga modumala sa provincial jail, ug gibaoran nga paningkamotan nga dili na masubli nga may mga drugas ug kontrabando nga makasulod sa bilanggoan.

Wala matagbaw si Davide sa pagdumala ni Macato sa CPDRC tungod sa pagkasakmit sa daghang shabu ug mga cellphones gikan sa selda sa mga piniriso. Gihangyo usab sa gobernador si Cebu PNP provincial director Eric Noble nga ibalik ang mga sakop sa Provincial Public Safety Company (PPSC) nga idestino sa CPDRC.

Matud ni Noble nga tumanon dayon niya ang kamandoan sa gobernador ug ipaestrikto ang pagbantay nga wala nay makapalusot og kontrabando sa bilanggoan.

Samtang kadtong lima ka piniriso nga didto sa ilang selda nakuha ang shabu silotan sila ug pasakaan og tukmang kaso. Ang bag-ong acting warden miingon nga mas estrikto nga pamaagi ang iyang ipatuman sa provincial jail, ilabi na sa pagpasulod sa mga tawo nga mobisita sa mga binilanggo.

Nagplano si Legaspi nga suspensohon usa ang dalaw sa CPDRC, apan mokunsulta pa siya sa Task Force CPDRC ug sa mga sakop sa Committee on Discipline and Investigation (CODI) sa Kapitolyo nga maoy moimbestigar sa mga prison guards nga nalambigit pagpasulod og mga kontrabando.

Samtang si PDEA-7 director Yogi Felimon Ruiz miingon nga padayon ang ilang imbestigasyon kun ngano nga daghan kontrabando ang nakasulod sa CPDRC ug kun diin gikan ang P92 mil nga kuwarta nga nakuha nila sa mga selda. Le Phyllis F. Antojado ug Christell Fatima M. Tudtud (BANAT NEWS)