2 tambungan ni Duterte karon

CEBU, Philippines - Maoy tambungan ni Presidente Rodrigo Duterte ang duha ka kalihukan sa iyang pagbisita sa Sugbo karong adlawa.

Unang tambungan ni Duterte ang groundbreaking sa Cebu-Cordova Link Expressway (CCLEX) alas tres sa hapon sa may merkado sa Pilipog, Cordova.

Human niini tambungan ni Duterte ang induction sa bag-ong mga opisyal sa Cebu Chamber of Commerce and Industry sa Waterfront Hotel Mactan Island, Lapu-Lapu City.

Matud ni Paulo Anota sa Presidential Communication Office, nga gikan sa Manila ang Presidente molahos sa Benito Ebuen Airbase ug mohimo og site inspection dayon adto na sa Cordova.

Si Senior Supt. Eric Noble, director sa Cebu Provincial Police Office, nagkanayon nga andam na ang seguridad sa pag-abot ni Duterte.

Awhag ni Noble sa mga tawo nga walay tuyo sa lugar nga adtoan sa Presidente nga dili na lang moadto aron dili makadugang sa trapik.

Dili paagian sulod sa upat ka oras ang Pilipog Bridge diin dapit ipahigayon ang groundbreaking.

Base sa traffic advisory sa Cordova Response Emergency And Traffic Enforcement (CREATE), ang taytayan dili paagian alas 12 sa udto hangtud alas 4:30 karong hapon.

Ang buhatan ni Cordova Mayor Mary Therese “Teche” Sitoy-Cho pinaagi sa CREATE niawhag sa mga motorista nga paingon ug gikan sa Cordova nga moagi una sa Gabi Bridge paingon ug gikan sa Dakbayan sa Lapu-Lapu. (Rowena D. Capistrano ug Gregg M. Rubio/GMR)

Sakyanan gibiyaan may himan sa pagsuyop

Mga drug paraphernalia nakit-an sa sulod sa giabandonar nga sakyanan sa Alviola St., Villa Gonzalo II, Tejero, Dakbayan sa Sugbo kagahapon sa buntag.

Matud ni Police Officer 2 Crisostomo Putalan sa Cebu City Police Office - Station 3 nga ang drug paraphernalia sama sa usa ka tooter ang nakit-an sa front seat sa itom nga Isuzu D-Max nga pick-up nga may temporary plate number nga CM 5797.

Usa ka residente ang ni-report sa kapolisan labot sa gibiyaan nga sakyanan diin abli sab ang duha ka bintana niini alas 6 sa buntag.

Gituohang nag-park ang sakyanan sukad sa alas 12 sa gabii ug gibiyaan sa tag-iya.

Wala pa nasayri sa kapolisan kung may shabu ba gawas sa drug paraphernalia.

Ang maong sakyanan giguyod sa taga City Traffic Operations Management pasado alas 11 sa buntag.

Si Jerry Arthur Ranay, CITOM supervisor, nagkanayon nga illegal parking ang ilang gihatag nga violation sa tag-iya sa sakyanan tungod kay nagbabag kini sa usa ka panimalay nga adunay signage nga “No Parking”.

Ang maong sakyanan ibutang sa impounding area sa CITOM ug ang plate number i-sumiter sa Land Transportation Office alang sa pag-ila sa tag-iya niini.

Ang sakyanan adunay Special Weapon and Tactics (SWAT) sticker.  Christell Fatima M. Tudtud ug Rowena D. Capistrano (BANAT NEWS)