Curry nabokya

CEBU, Philippines - Nakasinati si Stephen Curry  sa labing bati nga 3-point shooting sa iyang karera, apan si Kevin Durant mibagnos og maayo aron pagpabuhagay og 27 puntos sa 119-108 nga kadaugan sa Golden State Warriors batok sa Philadelphia 76ers sa nagpadayong duwa sa NBA kagahapon didto sa The Spectrum sa Philadelphia, Pennsylvania.

Daw sa napagngan og kahayag sa maong duwa si Curry nga wala makapasud bisan og usa sa gibuhian niining 11 ka 3-point shots. Bisan pa man niini nakaamot gihapon siya og 19 puntos.

Si Klay Thompson mihipos og 21 puntos, samtang si Draymond Green mitali og 14 puntos, 11 ka assists, unom ka rebounds ug upat ka steals alang sa Warriors nga miposte sa ikaupat nilang sunod-sunod nga daog aron pag-inat sa labing nindot nga baraha sa liga karon nga season ngadto sa 50-9.

Wala sab magpabitin ang karibal sa Warriors nga Cleveland Cavaliers nga mibihag sa Milwaukee Bucks ubos sa pagpangu nilang LeBron James ug Kyrie Irving nga nagkumboya’g 49 puntos.

Ang Bucks nakasikit unta sa iskor nga 85-86, apan ang dunk ni James miduslit sa mainit nga 11-0 rally nga maoy nahimong yawi sa Cavs ngadto sa kadaugan.

Si Malcolm Brogdon adunay 20 puntos alang sa Bucks, apan si All-Star Giannis Antetokounmpo nalimitahan ngadto lamang sa nuybe puntos.

Didto sa New York, si DeMar DeRozan mipatuasik og 37 puntos, apil na niini ang iyang turn-around jumper sa nahabilin nga 1.9 segundos nga maoy nag-aswat sa Toronto Raptors ngadto sa kulbahinam nga daog batok sa Knicks, 92-91.       Mao kadto ang ikaupat nga sagunson nga daog sa Raptors.

Si Carmelo Anthony mipupo og 24 puntos sa Knicks, apan siyam lamang sa 26 niya ka itsa ang iyang napasud.

Sa uban pang mga resulta, ang Atlanta Hawks miputol sa tulo ka sunod-sunod nilang pilde human gilubong ang Boston Celtics, 114-98, si Jeff Teague miiskor og 25 aron pangulohan ang Indiana Pacers batok sa Houston Rockets, 117-108, si Seth Curry mikadlit og 29 puntos sa dihang gipilde sa Dallas Mavericks ang Miami Heat, 96-89, samtang si Karl-Anthony Towns dunay 29 puntos ug 17 ka rebounds alang a Minnesota Timberwolves  nga milubong sa Sacramento Kings, 102-88. (BANAT NEWS)