2 drug suspects patay

CEBU, Philippines - Patay ang usa ka gipasanginlang notadong drug personality sa Dakbayan sa Danao human gikatahong namusil sa mga polis sa dihang gi-alarma nga nagpabuto sa iyang armas diha sa F. Ralota, Street, Poblacion, Dakbayan sa Danao niadtong nakalabay nga gabii.

Ang suspetsado giila nga si Don Vincent Mamites, nagpuyo sa maong dapit. Ang hepe sa Danao City Police, Sr. Insp. Alejandro Batobalonos nga nahinabi sa Banat News miingon nga miadto ang mga polis sa maong lugar tungod sa reklamo sa mga tawo nga adunay nagpabuto og armas sa ilang lugar.

Human nadawat ang reklamo dali nga miresponde ang mga sakop sa Special Weapons and Tactics (SWAT) aron pagsubay sa maong dapit.

Sumala pa ni Batobalonos nga pag-abot sa mga polis sa lugar ngitngit kaayo apan kalit lang adunay namusil sa mga polis hinungdan nga ilang natultolan kung asa nagtago ang nagpabuto hinungdan sa nahitabo nga pinusilay ug napatay kini.

Narekober sa mga polis ang usa ka .38 revolver. Si Batobalonos miingon nga anaa sa ilang drug watch list ang suspetsado ug makadaghan na silang nakadawat og reklamo gikan sa mga silingan nga magsige kini og pabuto og armas.

Samtang patay ang usa ka gidudahang drug pusher nga gituohan sa kapolisan nga nagpaabot og kustomer dihang kalit gipusil sa riding- in-tandem sa miaging gabii sa Brgy. Bangbang, Lungsod sa Cordova.

Si Police Officer 3 Ismael Limpangog  sa Cordova Police Station miila sa biktima nga mao si Joyely Pacaldo  alyas Dannyly, taga Brgy. Catarman sa mao gihapong lungsod.

Matud pa ni Limpangog  nga ang namatay nag-atubang na og mga kaso nga kalapasan sa Republic Act 9165  ug gipaubos na sa Oplan Tokhang apan wala motahan.

Duha  ka wala hiilhing mga lalaking nagsakay og motorsiklo ang nagpusil sa biktima. Patay na kini pag-abot sa Lapu-Lapu City Hospital. Anggulo sa ilegal drugs ang gitan-aw nga motibo sa maong pagpatay. Jojo Ugdol ug Romeo T. Limpangog (BANAT NEWS)