P5-M ransom ni Jee, sino ang nakinabang?
MANILA, Philippines - Nais malaman ni Sen. Bam Aquino kung sino ang nakinabang sa P5 milyong ransom na ibinayad ng pamilya ng pinaslang na Korean national na si Jee Ick Joo sa loob ng Camp Crame.
Ayon kay Aquino, mismong ang asawa ni Jee na si Choi Kyung-Jin ang nagsabi na nagbayad sila ng P5 milyon sa mga kidnaper noong Oktubre 31, 2016.
Balak busisiin ni Aquino sa pagpapatuloy ng pagdinig ng Senado sa Pebrero 2 kung sino ang nakinabang sa ibinayad na ransom.
Ipinaalala pa ni Aquino ang pahayag rin ng Philippine National Police na nagkabayaran sa mall pero hindi na ito natalakay sa pagdinig.
“There was a statement from the PNP na nagkabayaran sa mall pero hindi nila na-monitor kasi ginawa ng pamilya na hindi nagsabi sa kapulisan,” ani Aquino.
Kaugnay nito, hinikayat ni Aquino si PNP Chief Ronald “Bato” dela Rosa na tutukan din ang pagpuksa sa masasamang elemento sa loob ng organisasyon.
Sa pagdinig, binanggit ni dela Rosa na may nakabinbing 893 kasong administratibo laban sa mga tiwaling pulis habang 228 ang naresolba na.
- Latest