Kahangol sa bas ug graba
Napanid-an ni Cebu City Disaster Risk-Reduction and Management Officer Nagiel Bañacia nga kasagaran sa bukirang mga barangay nga nahiagom sa grabeng baha, mao say labing nameligro sa pagdahili sa yuta. Kining mga dapita nahiagom sa ilegal nga pagpangubkob sa bas ug graba nga naglakip sa mosunod: Budlaan, San Jose, Talamban, Bacayan, Pit-os, Pulangbato, Binaliw ug Agsungot.
Naigo sa samang problema ang bukirang mga barangay sa ubang dakbayan ug kalungsoran sa Sugbo ug Central Visayas. Apan ang nameligro pag-ayo mao ang mga dapit sa Metro Cebu nga nahimutangan sa labing daghan ug labing dagko nga mga konstruksiyon.
* * *
Ang nagpadayon nga construction boom tungod sa mga proyekto sa gobiyerno ug pribadong sektor sa Sugbo, gawas nga nakaato sa suplay sa semento, kabilya ug ubang construction materials, nakamugna sab sa lisud tagbawon nga taas kaayong demanda sa bas ug graba nga maoy labing nakagusbat sa atong kabaybayonan, kasapaan ug kabukiran.
Wa makatabang pagpanalipod sa kinaiyahan ang pagtugot sa gobiyerno pagtukod og mga istruktura sa kabukiran, kasapaan ug bisan sa kabaybayonan. Mao nga dili makapakugang ang mas subsob ug mas lapad nga pagbaha ug pagdahili sa yuta.
* * *
Mao sab kini ang hinungdan nga taphaw ang kampanya sa lokal ug nasudnong mga buhatan sa gobiyerno pagbadlong sa ilegal nga pagpangubkob sa bas ug graba. Ang paspas nga paglambo sa Sugbo nakaaghat sa lokal ug nasudnong mga opisyal paglingiw-lingiw lang.
Nakapasamot sa problema ang kalambigitan sa dagkong mga negosyante ug gamhanang mga politiko sa negosyo sa bas ug graba. Mao nga si bisan kinsang opisyal nga mangahas pagbaraw nila lubat-lubatan dayon sa seryusong mga hulga sa ilang kinabuhi.
* * *
Human nahiagom ang Sugbo ug ubang bahin sa nasud sa makalilisang nga pagbaha ug pagdahili sa yuta tungod sa kusog nga bunok sa uwan niadtong Lunes, malab-as ang sibaw nga mga awhag sa pagpanalipod ug pagpalambo sa kinaiyahan.
Hinaot nga ning higayona dili unta kutob lang sa naandan nga pagarpar nga moawop lang sab dayon inig tumaw sa mas makapaukyab nga mga kontrobersiya. Hinaot nga dili na mosugot ang katawhan nga ulug-ulogan lang. Hinaot nga ning higayona, magkahiusa na pag-awhag sa gobiyerno paghimo og matinud-anong mga lakang, sa dili pa uwahi ang tanan.
- Latest
