P2.2M shabu, 17 sikop sa buy-bust

CEBU, Philippines - Niabot sa kapin P2 milyones ang kantidad sa shabu nga nasakmit sa mga sakop sa San Nicolas Police Station ug City Intelligence Branch sa Cebu City Police Office gikan sa 29-anyos nga lalaki sa Mahayahay, Calamba pasado alas 2 sa niaging kadlawon.

Ang dinakpan giila nga si Jordan Ebao Zabala, ulitawo, kinsa dugay na nga gipanid-an ug anaa sab sa lista isip “high value target” sa pagnegosyo og drugas, sumala pa sa hepe sa San Nicolas Police Station, Chief Insp. Keith Andaya.

Nakuha sa mga polis gikan sa dinakpan ang tulo ka dagko nga putos nga dunay sulod nga gituohang shabu nga nitimbang og 173 gramos ug nasayran nga gikan sa Muntinlupa ang supply ni Zabala.

Samtang pito ka tawo ang nadakpan sa duha ka sunod-sunod nga buy-bust operation sa Pulpogan, Lungsod sa Consolacion sa niaging hapon.

Si Police Officer 1 Retchie Guilleran sa Consolacion Police Station niila sa ilang target nga si Sigfred de Guzman, 34, nagpuyo sa maong lugar.

Usa ka 17-anyos ang lakip sa gidakop sa gawas sa panimalay ni de Guzman nga daw nagpaabot og customer ug maoy gipalitan og shabu sa poseur buyer sa kapolisan.

Dali nga nisulod ang batan-on sa panimalay ni de Guzman ug sa pagbalik nagkuyog na ang duha ug gitunol ang shabu dayon sikop kanila.

Sa sulod sa panimalay ni de Guzman naaktuhan ang laing tulo nga nag-repack og shabu nga sila si Shirly Bayolanda, 27; Jose De Niles, 26, ug Algier Sala, 21.

Nakuha gikan sa mga dinakpan ang usa ka medium-size ug lima ka gagmay nga pakete sa shabu nga kantidad og P70, 800.

Laing nadakpan sa maong lugar mao sila si Renato Go, 36; Bobyles Sanchez, 33; Jonathan Dapio, Cliford Erguerro, 25 ug Bernel Marojon, 22.

Si Guilleran niingon nga si Go maoy ilang target sa operation ug si Sanchez mao sab ang nagtunol sa shabu ngadto sa poseur buyer ug didto sa sulod sa panimalay ang laing tulo nga nagsuyop og shabu. Nakuha gikan sa mga dinakpan ang mokabat sa P135,700 nga kantidad sa shabu.

Sa Dakbayan sa Lapu-Lapu, nasikop niadtong Martes sa ala 1:30 sa hapon sa Datag, Maribago, si Joseph Alba, 34-anyos, ulitawo ug walay trabaho kinsa nakuhaan og walo ka gagmay nga putos sa gituohang shabu.

Ikaduhang nasikop alas 7:35 sa buntag kagahapon mao si Rosevelt Dihayco, taga Sta. Lucia, Punta Engaño, kinsa nakuhaan og siyam ka gagmay nga putos sa shabu.

Sa laing bahin, nasikop sab si Vincent Plarizan, 19, taga Sambag 1, Dakbayan sa Sugbo, kinsa nakuhaan og lima ka gagmay nga putos sa shabu ug halin nga P400.

Laing nasikop sa mga sakop sa Cebu City Police Office ang usa ka lalaki samtang nagsuyop og shabu sa iyang giabangan nga kwarto sa Melody Rental sa may dalan D. Jakosalem pasado alas 5 sa hapon niadtong Martes.

Giila ang suspek nga si Charlton Bacol Feliza alyas Toto, 33, lumad taga Cadjanao, Dinagat Province, Surigao del Norte, kinsa usa ka call center. Jojo C. Ugdol, Romeo T. Limpangog, Rowena D. Capistrano ug Aldreth Cayas (BANAT NEWS)