Karneng baka ug manok gikumpiska

CEBU, Philippines - Niabot sa 100 ka kilong karne sa baka ug 160 ka buok manok ang nakunpiskar sa mga sakop sa Department of Veterinary Medicine and Fisheries, kagahapon sa buntag sa Carbon Public Market sa siyudad sa Sugbo.

Ang pangulo sa Team A sa DVMF nga si Cassandra Dilao niingon nga ang maong mga karne, dili na mahimong kan-on sa tawo kay wala kini matarong og dala.

Sumala pa niini nga kontaminado na ang mga manok human mayabo sa karsada ang gisudlan niining baril diin gisagol ang nahugaw ug ang wala mahugawi.

Dugang pa ni Dilao nga lakip nilang gikonpiskar ang karneng baka kay base sa pangangkon sa tag-iya, gitiwasan nila ang maong baka human kini nagluya ug wala kini niagi og pakisusi una giihaw.

Asoy sa team leader sa DVMF nga kinahanglan susihon gyud ang mga karne sa wala pa ihawa ug human maihaw kun mahimo bang kan-on sa tawo o dili kay basin aduna kini sakit nga makadaut na hinoon sa panglawas sa tawo.

Si Dilao, nitug-an nga ang mga nakonpiskar nila nga karne, ilang ipakaon sa mga kahayupan sa Cebu City Zoo, Dog Pound ug kun dili na mahimong makaon sa mga hayop, ila kining ilubong sa yuta. (BANAT NEWS)