Barko nalunod, usa ka tripulante gipangita pa

CEBU, Philippines - Nalunod ang usa ka cargo vessel nga gikan sa Cebu ug nagpaingon unta sa Tacloban City kaniadtong Martes sa gabii kay gikuso-kuso kini sa dagkong balud sa kadagatan pag-abot niini sa Canigao Channel sa tunga-tungang bahin sa Bohol ug Leyte.

Ang pangulo sa Coast Guard nga si Commander Dionilett Ampil nitug-an nga ang M/V Meredian Tres nigikan sa Pier 3 sa dakbayan sa Sugbo kaniadtong Martes sa alas dos sa hapon. Nagkarga kini og daghang container vans.

Tungod sa kadagko sa mga bawod didto na sa lawod nasibog ang mga kargamento mao nga wala na mabalanse ang barko ug maoy nakaingon sa pagkalunod.

Matud ni Ampil nga nakadawat sila og tawag gikan sa coast guard Danao nga maoy nakadawat sa distress call sa barko hinungdan nga dali sila nga nakig-alayon sa Eastern Visayas Coast Guard Station.

Ubay-ubay nga mga barko nga nakaagi sa maong dapit mitabang sa mga tripulante, apan usa gayud kanila ang wala pa makit-i nga mao si Benjamin Orola, ang crane operator sa barko. Ang mga naluwas nga tripulante nahibalik na dinhi sa Sugbo kagahapon, gawas sa upat nga tua pa sa Butuan.

 Ang tagdumala sa nalunod nga barko gimandoan na nga mosumiter og marine protest ngadto sa Coast Guard nga adunay hurisdiksyon sa dapit diin kini malunod. (BANAT NEWS)