Fajardo nabalaka sa nagkaduol nga playoffs

CEBU, Philippines - Gibati og kabalaka si three-time PBA MVP JuneMar Fajardo karon nga  nagkaduol na ang playoffs sa PBA All-Filipino Cup kini bisan pa og sila ang nag-una sa standing ug nakabaton og “twice-to-beat” advantage sa quarterfinals.

Matud ni Fajardo nga dili sayon ang ilang agian aron madepensaan nila ang  trono tungod kay anaa ang risgo sa injuries dili lang kaniya, apan lakip na sa iyang mga teammates.

Ang  Sugbuanong sentro  dili gusto nga masubli ang nahitabo kaniya sa miaging 2016 Philippine Cup diin siya nakahiagum og injury  ug wala kasugod og duwa sa finals batok sa Alaska Aces.

Ang pamahayag ni Fajardo gidasonan sa iyang teammate nga si Chris Ross nga mitambag sa iyang mga kauban nga dili na kaayo mopalabi sa nahabilin nilang mga duwa sa eliminasyon  aron malikayan ang injury.

Mga players sa San Miguel nga may gihambin karon nga minor injuries naglakip nila ni Yancy De Ocampo, Gabby Espinas ug Alex Cabagnot. (BANAT NEWS)