Mahindra delikado matagak

CEBU, Philippines - Milagom  ang kahigayonan  sa Mahindra Floodbuster nga makasulod sa quarterfinals  human sila mapilde ngadto sa TNT KaTropa, 92-104 kagabii sa PBA Philippine Cup didto sa Cuneta Astrodome.

Human sa ilang dakung kadaugan batok sa Meralco Bolts, ang Mahindra wala na mosalir batok sa KaTropa nga mipakita usab sa ilang kaagresibo aron makuha ang krusyal nga daog. Ang Floodbuster nahimutang karon sa ika-11 nga dapit sa standing sa ilang 2-6 nga baraha, samtang ang TNT mikandado sa ilang luna sa playoffs sa record nga 5-4.

Tungod kay nahimutang sila sa delikadong sitwasyon, ang Mahindra agresibo sa ilang opensa sa pagpangulo nila ni Alex Mallari ug Phil Paniamogan aron moposte’g 57-51 nga labaw sa halftime.

Mihupas ang init nga pagratsada sa Floodbuster sa third period, samtang miduslit sa scoring sa KaTropa si Mo Tautuaa ug Cebuano rookie nga si RR Pogoy aron mailog ang labaw, 68-67.

Sa maong kadaugan, ang KaTropa mohatag ni coach Nash Racela sa labing una niyang playoff appearance isip usa ka PBA head coach.(BANAT NEWS)