CIT-U, UV daog dayon sa 2nd Capt. Raul Cabanero Cagefest

CEBU, Philippines - Gipakuratan sa Cebu Institute of Technology-University  (CIT-U)  Wildcats ang University of Cebu (UC) Webmasters aron makaeskapo bitbit ang 67-65 nga kadaugan sa kulbahinam nilang duwa pagsugod sa 2nd Capt. Raul Cabanero Inter-collegiate  basketball tournament niadtong Martes didto sa Barangay Bulacao Sports Complex,   Talisay City.

Si Joshua dela Cerna, kansang duwa wala gyud molubad gikan sa pagsugod mao lang ang nakaiskor og double figures sa iyang 31 puntos aron pangulohan ang balanseng opensa sa CIT-U   nga gisugat dayon og daog.

Labaw og tres puntos sa halftime, 29-26, ang  Wildcats padayong mihagwa sa Webmasters aron moposte sa ilang komportabling labaw, 51-40 sa third period. Apan ang UC sa paningkamot ni  Gileant Delator misikit ug  posible pa untang makatabla ug mahatod ang duwa ngadto sa overtime dihang ang CIT-U labaw lang og dos puntos, 67-65 sa nahabiling 11 segundos sa fourth period, apan si Garciano Puerto nasipyat sa iyang tirada.

Si Delator mipupo og 12 puntos, samtang si Puerto ug si Udtohan parehong miantog og 11 puntos.

Sa laing duwa, daog sab ang misugat sa University of the Visayas (UV) Green Lancers human ilang gipilde ang University  of Southern Philippines (USPF) Panthers, 97-90.

Gipangulohan nilang Tristan Albina ug Josue Segumpan ang UV nga  parehong mitusak og 16 puntos, gisundan ni Monic Soliva sa iyang 15 puntos ug nilang Rey Suerte ug Michael Maestre nga mitimbre’g 13 puntos matag usa.

Si Managor mao sab ang nangu sa USPF nga adunay 26 puntos, samtang laing tulo niya ka teammates ang miiskor sab og double digits.

Ang USPF labaw og 12 puntos sa sayong bahin sa final period, apan nahilis kini sa nahabiling tres minutos dihang milusad og ‘man-to-man’ ang UV.

Gumikan niini, naratol  ang USPF ug nakamugna og mga turnovers hinungdan nga nakawat sa UV ang daog.

Ang liga nahimo  pinaagi sa paningkamot ni Bulacao Brgy. Capt. Raul Cabanero, inabagan nila ni konsehal Banjo Abastillas, Darwin Cabanero, Agnes Lastimosa.

Kining maong  liga nga ubos sa bendisyon sa CESAFI pinaagi ni commissioner Felix ‘Boy’ Tiukinhoy  Jr.,  gipadagan ni  CESAFI deputy commissioner  Danny Duran ug head technical referee Edwin Dejacto Sr. (BANAT NEWS)