Chris Paul di ka duwa sud duha ka bulan
CEBU, Philippines - Ipaubos sa operasyon si Los Angeles Clipper point guard Chris Paul gumikan sa gisi sa wala niining kumagko hinungdan nga dili kini makaduwa gikan sa unom hangtod sa walo ka semana.
Nahiaguman ni Paul ang maong injury sa ikaduhang kuwarter atol sa 120-98 nga kadaugan sa Clippers batok sa Oklahoma City Thunder human sila nagbangga ni Russell Westbrook.
Sa inisyal nga eksaminasyon daw nakasinati lamang siya og sprain, apan sa dihang gi-MRI (magnetic resonance imaging) nakita nga mas seryoso diay ang angol ni Paul.
Kun sakto ang panahon nga gitagana sa iyang pagbalik, si Paul makapalta og gikan sa 17 hangtod sa 26 ka duwa.
Si Paul nga siyam ka higayon nga NBA All-Star, dunay average nga 17.5 points, 9.7 assists, 5.3 rebounds ug 2.25 steals matag duwa karon nga season. (BANAT NEWS)
- Latest