Mag-asawa ninakawan, tinodas
MANILA, Philippines - Natagpuang patay sa kanilang banyo at kusina ang isang mag-asawa kamakalawa ng gabi sa Maragondon, Cavite.
Ang mag-asawang nasawi ay kinilalang sina Bienvenido Muncal, 70 at misis nitong si Cecilia, 68, retiradong guro at kapwa residente ng Brgy. Garita-A ng nasabing bayan.
Ang mag-asawa ay kapwa basag ang mukha, tadtad ng mga saksak sa iba’t-ibang bahagi ng katawan habang ang lalaki ay nakatali pa ng lubid sa leeg na palantandaang pinahirapan muna ang mga ito bago tuluyang pinaslang.
Batay sa ulat, dakong alas-6:35 ng gabi nang magtungo sa himpilan ng pulisya ang isang Reynold Tañagras, 37, negosyante at kamag-anak upang iulat ang pagkamatay ng mag-asawa.
Ayon kay Tañagras, ay pumunta siya sa bahay ng mag-asawa dahil gabi na ay walang pang nakasinding ilaw ang kanilang bahay.
Pagdating doon ay nakita niya ang duguang mag-asawa na wala nang buhay.
Sa pagresponde ng mga pulis ay nakakalat ang mga gamit at posibleng nanlaban ang mag-asawa sa mga magnanakaw.
- Latest