Lalaki sa Ukraine nagpalit ng pangalan para lang magkaroon ng bagong iPhone
ISANG lalaki ang nagpalit ng pangalan para lang mag-karoon ng bagong smartphone.
Lumilingon na ngayon sa tawag na “iPhone 7” ang dating si Olexander Turin matapos mag-alok ang isang electronics store sa kanilang lugar ng libreng iPhone 7 sa sinumang gagawing “iPhone 7” ang kanilang pangalan.
Hindi naman masisisi sa kanyang ginawa ang 20-anyos mula sa siyudad ng Kiev dahil napakamahal ng pinakabagong smartphone mula sa Apple kung bibilhin ito sa kanilang bansa.
Aabot kasi ng $850 (katumbas ng higit sa P41,000) ang isa nito samantalang kailangan mo lang gumastos ng $2 o wala pang P100 kung gusto mong magpalit ng pangalan sa Ukraine.
Noong una ay labis ang pagkabigla ng pamilya ni Ole-xander dahil sa kanyang ginawang pagpapalit ng pangalan ngunit sa huli ay natanggap na rin nila ito.
Inisip na lang ng kapatid niyang si Tetyana Panina na isa lamang ito sa mga paraan ng kanyang kapatid upang ipahayag ang kanyang sarili kaya sulit na rin daw ang ginawa nitong pagpapalit ng pangalan.
- Latest