Reunion sa Sexbomb Girls

CEBU, Philippines - Nahimong reunion ang panagtagbo sa tanang miyembro sa Sexbomb Girls atol sa haya sa nipanaw na nga direktor sa afternoon series  nga Daisy Siete nga si Ruel Ikamen. Nag-post og hulagway si Rochelle Pangilinan sa Instagram account niini kung diin nagkatapok ang mga bitoon kaniadto sa seryeng  Daisy Siete.

Bag-ong record

Nilangkat og bag-ong record ang anak nilang Dra. Vicki Belo ug Hayden Kho Jr. nga si baby Scarlet Snow Belo human niabot og 500,000 ang followers sa Instagram account niini. Todo pasalamat ang ginikanan ni Scarlet ngadto sa followers sa ilang anak.  Si Scarlet maoy gitawag karon nga  “most followed celebrity baby on Instagram” sa nasud.

Pahumanon og eskwela

Kung si Maricel Laxa-Pangilinan  ang pasultion,  ganahan siya nga dili ma-expose sa showbiz ang iyang  anak nga si Donny Pangilinan. Gusto sa aktres nga mo-focus sa pagtungha  ang iyang anak. Nakugang si Maricel sa dihang nilenggua ang iyang anak nga ganahan kini mag-artista.

Niangkon na gyud!

Niangkon  na gyud si Macky Mathay sa relasyon nila sa aktres nga si  Sunshine Cruz. Nagkauyab ang duha niadtong September 18, 2016 . Una na nga nikisaw ang report nga duna sila’y relasyon sa dihang nasigpatan nga nag-holding hands samtang nanuroy. 

Trailer nilugwa na  

Gipagawas na sa Star Cinema ang official trailer sa bag-ong pelikula nilang Angelica Panganiban ug Dingdong Dantes nga nag-ulohan og "The Unmarried Wife". Molugwa sab si Paulo Avelino sa maong pelikuka  nga gitakdang ipasalida karong November 16 ubos sa award-winning movie director nga si Maryo J. De Los Reyes.

Pag-umangkon sa senador

Gipaila-ila isip bag-ong housemate sa PBB ang pag-umangkon ni Senator Risa Hontiveros nga si Luis Hontiveros. Gawas ni Luis, gipaila-ila usab ang Binibining Pilipinas 2012 first runner-up nga si Ali Forbes isip usa sa mga housemate.

Napakyas pagdaog

Napakyas pag-angkon sa titulo sa Manhunt International 2016 ang pambato sa Pilipinas nga si Don Cochico. Nalakip sa top 16 si Don apan wala na kini nakalahutay ngadto sa Top 5. Gideklarang mananaog ang taga Sweden nga si Patrik Sjoo.

Proud sa half-sister

Nagpaabot og mensahe ang TV host/actress nga si KC Concepcion ngadto sa half sister niini nga si Cloie Syquia Skarne kinsa representante sa Sweden sa bag-o lang gipahigayon nga Ms. Earth 2016 Pageant. "We feel so proud of [Cloie]," tweet pa niini.  

Wala’y paghupas

 Mainitong gihangop sa  netizens sa comeback exposure ni 'Kabayan' Noli De Castro alang sa programa niini nga “Kababalaghan”.  Gi-upload ang preview sa maong programa sa Facebook, nikabat kini og 250,000 ka views, 5,000 ka reactions, ug 1,500 ka share. (BANAT NEWS)