‘Oplan ligtas biyahe’ umarangkada
MANILA, Philippines – Sinimulan na kahapon ng Department of Transportation (DOTr) ang kanilang programa na ‘Oplan ligtas biyahe, Undas 2016’ para magabayan ang mga motorista at pasaherong bibiyahe patungo sa kani-kanilang probinsiya.
Layunin ng DOTr na matiyak ang kaligtasan ng mga biyahero na gagamit ng iba’t ibang uri ng transportasyon.
Sa ilalim ng nasabing oplan, inilagay ng DOTr ang kanilang mga kaugnay na ahensya sa heightened alert status sa kasagsagan ng Undas.
Bahagi ng programa ang inspeksyon ng Land Transportation Franchising and Regulatory Board (LTFRB) sa kaligtasan ng mga bus.
Nag-depoly naman ng karagdagang tauhan ang Toll Regulatory Board (TRB) sa mga toll plazas upang tiyaking hindi humaba ang pila ng mga sasakyan.
Bumuo naman ang Manila International Airport Authority (MIAA) ng management team na binubuo ng mga airport managers na personal na magbabantay sa operasyon at biyahe ng mga eroplano.
Pananatilihin naman ng Philippine National Railways ang kasalukuyang dami ng kanilang mga tren sa Metro Manila South Commuter at Bicol Commuter Services.
Nagbabantay namang maigi ang Maritime Industry Authority (Marina) sa lahat ng mga pampasaherong barko bago pa man ang nakatakdang departure nito para tiyaking masusunod lahat ng mga panuntunan lalo na ang “no overloading of passengers and cargo” policy.
- Latest