EDITORIAL - Lantugi sa basura

Karong hapon, ang tulo ka justices sa Court of Appeals maminaw sa mga baruganan nila ni Cebu City Mayor Tomas Osmeña ug ni Konsehal Joel Garganera, sa isyu kun angay ba nga dili na palabayan og mga basura ang Inayawan Sanitary Landfill.

Nagpanikad na si Osmeña nga kahatagan siya og higayon aron pasabton niya ang mga justices kun ngano nga nakahukom siya nga ang dakbayan mobalik paglabay og mga basura diha sa karaang landfill.

Si Garganera usab mibaid na pag-ayo sa iyang kaisipan aron nga hait ug pintok ang iyang mga luwatan nga pamahayag atol unya sa hearing nga dumalahon ni Associate Justice Gabriel Ingles ug duha ka kaubang justices.

Nindot unta kun uyonan sa mga justices ang hangyo ni Osmeña nga tugotan ang mga sakop sa media sa paghimo og live coverage sa court proceedings aron makakita ang katawhan sa hearing.

Husto si Osmeña nga ang maong isyu nga diskutihon atol sa hearing mahinungdanon kaayo nga makita ug masabtan sa katawhan kay naglambigit kini og public interest.

Kun mahitabo nga ang Court of Appeals moisyu og Temporary Environmental Protection Order (TEPO) nga magdili sa dakbayan pagpadayon og labay’g mga basura sa Inayawan landfill, dako kaayong problema kun kini ipatuman dayon nga wala pay laing dapit nga kalabayan.

Kinahanglan nga ang mga justices dili gyud dayon magdali-dali sa ilang paghukom, pananglit makahuna-huna sila sa pag-isyu og TEPO ngadto sa dakbayan.

Sa tanang mga landfill dinhi sa Sugbo, ang landfill ra sa Consolacion maoy mas duol ug mas menos og gasto ang dakbayan kun anha kini mobalik paglabay’g mga basura.

Ang dakbayan sa Naga ug Talisay adunay mga landfill apan supak ang ilang mga opisyal nga ang dakbayan sa Sugbo adto molabay’g basura sa ilang dapit. Ang laing landfill tua sa Aloguinsan nga kapin sa 70 kilometros ang gilay-on ug mosamot kadako og gasto. Kun sirad-an man ang landfill sa Inayawan, klaro na kun asa ang mas makabentaha ang siyudad.